Victoria Kaapanda
ONGWEDIVA-Etopolo lyoshikukuta moshitopowa shaShana olyi li metifa, oku kwathela mboka ya dhengwa koluhepo osho wo mboka ye na iimuna tayi si ondjala. Ndhoka odha popiwa komupresidente Hage Geingob ohela sho a li ta talele po oshitopolwa shaShana nokupulakena komawupyakadhi osho wo okuyamukula komapulo gaakwashigwana.
Geingob okwa li a ende pamwe noominista dhe odhindji dhiikondo ya yooloka, opo dhi vule okuyamukula omapulo agehe taga pulwa, sha ikwatelela kiimpungu yomapulo.
“Aantu ye li 15 367 oya ishangitha okukwathelwa okutopolelwa oshikukuta oshowo iikulya yiinamwenyo. Omuyalu ngoka ogundji nogu vulithe pomuyalu ngoka twa li twa tengeneka, sha ikwatelela koshimaliwa shoka sha tengenekwa okukwathela,” Geingob ta ti ngaaka.
Ta gwedha po ta ti epangelo olya gandja iiyenditho okukwathela okutopola oshikukuta miikandjohogololo ya yooloka.
Okwa li a kumagidha kehe omukwashigwana e li monkalo ya dhigupala nota pumbwa eyambidhidho lyoshikukuta opo a kale a ilopota koombelewa dhokansela nayo opo ya kwathelwe nokutopolelwa oshikukuta.
Oshana osha pewa oshimaliwa shi thike poomilliona N$1,5 oku kwathela iitopolwa mbyoka yi li moompumbwe dhomeya osho wo okwiindjipaleka ootenga dhomeya.
“Epangelo olya ipyakidhila nomakonakono nkene lyi na okwiindjipaleka omeya miitopolwa ya yooloka, ngoka taga tengenekwa poshimaliwa shi thike poomilliona N$20,” Geingob a gwedha po ngaaka. Ooshako dhiikulya yiimuna dhi li 800 odha gandjwa miitopolwa ngashi Uukwangula nEmbandu omanga dhi li 1 800 dhi li mondjila.
Presidente okwa ti aakwashigwana otaya ende kashona okulanditha po iimuna yawo mbyoka tayi si ashike kondjala inaya mona po sha, aantu ashike ye li yaali moshitopolwa ashihe ye na ehalo okulanditha po oongombe dhawo. Ethimbo ndyoka lyoshigongi omupresidente okwa li a gandja ompito koyendji opo ya vule okupula omapulo, noga ga li ga yamukulwa agehe.