Charles Ndeumane
Aantu oyendji mwa kwatelwa aaleli oye li ompinge nomukalo moka iikulya yoshikukuta hayi topolwa, oshoka anuwa otagu ka hepeka aantu oyendji mboka nayo ye li mompumbwe onene.
Kansela gwoshikandjohogololo shaNiipa Vilho Nuunyango okwa ti omulandu ngoka gwa tulwa po kutya ngele megumbo omu na omuntu gumwe ha mono iiyemo yi vule poshimaliwa N$3 100 egumbo ndyoka inali gwana okupewa iikulya yoshikukuta ogwa patela aantu oyendi pondje mboka ya pumbwa iikulya unene.
“Megumbo otashi vulika mu kale mu na omuntu ha mono iiyemo yi li pombanda ashike omuntu ngoka megumbo iha kwathele mo. Aantu momagumbo ngoka oya pumbwa iikulya yoshikukuta ashike omulandu otagu ti itaya vulu okuy i pewa oshoka opu na aantu mboka ye yi pumbwa unene.
Molwaashoka ongaaleli omagumbo gomoshikandjohogololo shetu ngoka ga pumbwa omayambidho giikulya out ga shi ohatu ningi oonkambadhala tu ya yambidhidhe,” Nuunyango ta ti.
Kansela gwoshikandjohogololo shaShakati West Aram Martin okwa koleke kutya omushangwa gwelandulathano lyiikulya yoshikukuta otagu ti ngele ngoka e li omutse gwegumbo oha mono iiyemo yi vule poshimaliwa N$3 100 egumbo lye itali pewa oshikukuta oshoka ota vulu okulanda iikulya, ashike opu na oompito moka taya vulu okupewa oshikukuta.
“Ngele mwene gwegumbo oku na iiyemo nande oN$12 000 ndele oku na aantu oyendji unene megumbo lye ota vulu okuya kokomitiye yomukunda ndele ta popi uudhigu we, ota vulu okupewa iikulya yoshikukuta, osho tuu natango nande okomulongisikola ngoka e na aantu oyendji megumbo ye natango oku na nande ohauto hayi nanwa kehe omwedhi, otayi ashike kokotiye ndele eta popi uudhigu we,” osho Aram a popi ngaaka.
Omukalimo gwomomukunda Onamenye Priskila Jonas okwa ti omilandu ndhoka hadhi landulwa mokutotha mo mboka ya pumbwa iikulya yoshikukuta unene kagu li mondjila oshoka omagumbo ngoka taga monika ge li nawa ge na omatungo niihauto olundji oge na aanegumbo oyendji’ onkene oga pumbwa omayambidhidho giikulya yoshikukuta.
“Nale okwa li haku tiwa ngele megumbo omu na ongulu inamu pumbwa okugandjwa iikulya yoshikukuta oshoka otashi ulike kutya omun a aantu ye na iiyemo yi li nawa.
Oshinima shoka osha puka oshoka ethimbo limwe aantu mboka ye li mo haya longo oyel i komaushimba nokomagumbo ihaya yambidhidhako,” osho Jonas a ti.