Uuministeli womidhingoloko, iihwa nomapashiyono mehulilo shiwike tali ya otau ka patulula omatungo omape ngoka taga ka kala ge na omayakulo ga yooloka okugamena oshikunino shiinamwenyo shEtosha. 

Otaku ka patululwa omatungo ngoka taga kala taga zi aagameni yomEtosha osho wo ehala lyokugongela nokuahalakanitha po iiyagaya ya ekelwahi. 

Epatululo lyopambelewa otali ka kala ko momasiku 28 gaMaalitsa nuumvo, kokapale komaudhano gokoompadhi taka ithanwa Ombika, meni lyehala lya gamenwa mEtosha. 

Omunambelewapitithi omukuluntu muuministeli womidhingoloko, iihwa nomapashiyono Vilho Hangula okwa ti omahala ngoka otaga kala ga simana oshoka otaga ka longithwa okugamena uushitwe niiyamakuti osho wo okukaleka po uuyogoki mEtosha. 

Okwa popi kutya oshiindingili shoka otashi ka patululwa pambelewa kuminista gwomidhingoloko Indileni Daniel opamwe naanambelewa aanene ya yooloka. 

“Ehala ndika otali ka dhana onkandangala onene mokugamena Etosha osho wo oku li kaleka lya yela. Otali ka gandja wo olukalwa kaagameni yEtosha,” ta popi ngaaka. 

Ta gwedha ko kutya ehala ndika otali ka longitha aagameni nuupu uuna taya patolola nokumona mpoka tapu pumbwa omayakulo gawo. 

Hangula okwa fatulula kutya egameno mEtosha olya simana oshoka omu na iiyamakuti yongushu mbyoka hayi hili aatalelipo moshilongo, onkene oyi na okugamenwa nokukalekwa po. 

“Omapashiyono oga simana moshilongo shetu oshoka ohaga dhana onkandangala mekoko lyeliko lyoshilongo oshoka ohaga gandja iilonga nokuyambidhidha aanangeshefa moshilongo,” Hangula ta ti ngaaka. 

Ta gwedha ko kutya ehala lyokwoopaleka otali ka yambidhidha okugongela iiyagaya ya ekelwahi kaatalelipo mEtosha. 

Ta ti, iiyagaya ngaashi oonayilona, uukende, oondooha, oombapila niikulya ya ekelwahi otayi kala hayi gongelwa nokwe ekelwahi pamukalo opo kaayi halakane. 

“Shika otashi ka kwathela okukaleka Etosha lya yela nokugamena iiyamakuti kiiyagaya mbyoka yaa na okulya,” ta popi ngaaka. 

Ta fatulula kutya uuna iiyamakuti ya li iinima inaayi wapa otayi vulu okweehama e tayi si , nuuna ya tetwa komakende otashi tula iiyamakuti moshiponga. 

Hangula okwa oti okukaleka Etosha lya yela ohaku li monikitha nawa nohashi hili wo aatalelipo. 

-vkaapanda@nepc.com.na