Loide Jason Kaviveterue Virere Victoria Immanuel
!Hūb di ǁûs, Netumbo Nandi-Ndaitwahs ge mîmā, î-i tā xū-e !khō-oahe, Etosha !Hū!nāsi ǀGuru!hanaba ǁkhaubas !aroma, ǁnāpab ge ǀgaisa ǀaeba !âgu nē ǀguru!hanab hîa !narisarima-aona !hūb !nâ hāsa ra ǂgaeb diga a ǂkhôas khao!gâ. ǁÎs ge ge mî, Etosha ǀGuru!hanab a Namibiab !narisarimas di ǁâǂkhō !khaisa tsîb ǁnā-amaga tare-i ǀgui-i ga hā, xawe nî ǁkhaubahesa.
ǁÎs di haisis hîab ge ǂGuro Ministeri, Elijah Ngurareba !Haosiǂnûs !nâ ǂoa ge wekheb di Wunstaxtsēs ai a mā!kharus !nâs ge Nandi-Ndaitwahsa nē ǀguru!hanab tsî ǀgūse ǁgoe ǀhûhâsigu nî ǁkhaubahe !khais nî aimâihesa ge !gara!ā tsî ǁkhā soab ai gere ǂgan, ǀgui!nâxasib a ǂhâbasa !khaisa nē ǂōǂōsiba !khōs !nâ. !Khausa ǀaeǂhuwib ge 22 Taraǁkhumuǁkhâb 2025 !nâ tsoatsoa tsî Omusatib tsî Oshana ǀkharikha ǁga ge khoraǂuisen. ǀGamǁî ǀaeǂhuwib ge 24 Taraǁkhumuǁkhâb dis ai ǁkhawa ge ǁnā tsî ǀnai go a ǂkhôahe !û-aigu tsî !garo!ādi ûitsamaxūn tsîna !aorosasib !nâ ge mâi.
Ministers ge sao!gûra dî!nâǁgamǁare-i !nâ ge mî, ǁaupexa 854 000 (38%) hektargu Etosahab diga a ǂkhôasa !khaisa. “Nētsēs kōsen ge ǀgui ǂkhoa-i, !nani ǁgûn tsî !nona !airina ǁō hâ. Nau ûi!gau hâ ǀgurun !aroman ge ǀgoan ǀaedī-aona ge sîǂuihe, ǂhâbasa ǀae!khōde ǁîna nî māse,” tis ge ministersa ge mî. Ai!âs ge ministersa a mîs ge, nē mâsib Etoshab dib ǁnāti ī, xaweb nē ǀguru!hanaba hoaǁae noxopa ǁkhowa-amsase sari-aon !aroma mâsa. !Hūb di ǁûs ge ǁîs haisi-ams !nâ ge mî, Namibiab ǁKhaubasens ǀHûsa (NDF) xun ge 311ǁanina a sîǂuihe tsî 150 ǁanin ministeris ǂNamipeba Mûǂams, Haiǀgoms tsî !Narisarimas (MEFT) din ǀkha ǀhao hâse ǀguru!hanab ǂganagab !nâ sîsengu ǀkha ǁaxa isa. Nau ǀkhāb ain ǀguru!hanab !auga nî huise 136 NDF ǁanina Omusatib tsî Oshana ǀkharikha !nâ, MEFTs ǁanin tsî mā-amsenxa ǀhûhâsigu ǁanin ǀkha gere huise.
Omusatib ǂgari-aon ge ge ǁîn ǂhuwi!an ge ûitsamaxūn, ǁgamā!khaigu tsî !û-aigu !aroma kaise ge ǁaixa. ǂGari-aokha, Nowa Elagob tsî Iingo Shikaleb hâkha hîa ge nē ǀaeǂhuwib !nâ ûitsamaxūn tsî !û-aiga a ǂoa!nâkha, nau ǂgari-aon ǀkha ǀhao hâse tsûaǂgaoba ge ūǂui. Otamanzis ǂgiǂgosi ǀawemā-aob, Johannes Iyambob ge ge mî, ǁîb beros ge hoa ǂkhôadīsa ǂgari-aon di xoakhâiga a !khō!oa tsî ministeris !ereamsa tani hâs di oe-ams ǀguisa !âu hâ !khaisa.