Elelo lyondoolopa Helao Nafidi otali longekidha okutembudha etoto lyiiyagaya ndyoka lyi li ngaashiingeyi mondoolopa Omafo, okuya kEngela.
Mayola gondoolopa yaHelao Nafidi Darius Shaalukeni okwa ti shoka otaye ke shi ningi omolwuundjolowele negameno lyoshigwana.
“Otwa li twa gongele oshimaliwa, nokutembudha aakalimo mboka ye li pooha netoto, oshoka olwithi lwa kala nokuza metoto moka, olwa kala oshiponga kaakalimo unene ye li popepi,” ta fatulula ngaaka.
Ta ti, hoka taya tembudhile etoto lyiiyagaya, oya pewa nale epitikilo nonzapo okuza kuuministeli womidhingoloko.
“Otushi shi nawa kutya etoto mpoka lyi li olya pumbwa okutembudhwa po meendeelelo, onkene otatu shi ningi mbala. Oshigwana nashi indhindhimikile okathimbo hoka tatu ka kwata, oshoka otatu shi ningi,” ta ti ngaaka.
Ta ti shoka sheya kwata pethimbo ndika omilandu ndhoka yena okulandula.
Ta kumagidha oshigwana shi hulithepo okutema omililo metoto oshoka oshanika oshiponga naangoka taka andhika teshi ningi otaka pewa egeelo.
Elelo lyondoolopa Oshikuku nalyo olya tokola okutembundha etoto lyiiyagaya omolwa etamunuko lyondoolopa ndyoka ta li ende lyuuka komeho.
Omupevi mayola gwelelo lyondoolopa Petrus Petrus okwa ti, elelo lyondoolopa olya longekidha nale ehala ko kule nondoolopa hoka ta li tembundhilwa.
“Etoto ndyoka okwa li lye yapo omimvo ndho nale, onkene shika otashi ulike kutya ondoolopa yaShikuku otayi humu komeho,” ta fatulula ngaaka.
Ta gwedha po kutya shika otaye keshi ninga omolwa uundjolowele woshigwana.
Omagumbo ngoka omape taga tungwa, otaga pitilile nale etoto ndyoka.
‘’Ehala lya tya ngaaka ina li wo pala okukala mokati kaantu, sho osho shoka ta tu longekindha okuli tembudha po,” ta popi ngaaka.
Mayola ta ti, shoka sheya kwata, oshimaliwa, nonando ya ningi omayindilo kepangelo, oya tegelela ashike eyamukulo.
Ta ti, ngele oya etha etoto lyi kale mpoka, oshanika oshiponga kuukalinawa waakalimo yomondoolopa moka.
Shika otashika hila wo aakalimo mboka ye li popepi netoto ndika ya yeko nelalakano okutoola iikulya nomakende, oondooha oshowo iipumbiwanima yilwe mbyoka haya ka landitha.
Komatoto ohaku ekelwahi iinima oyindji, mwa kwatelwa iikulya yaninga nayi, sho hashi vulu okuhila aantu ye li moluhepo ya konge uuhupilo wawo hoka.
Jona Shikongo ngoka naye ta tungu egumbo lye okupitila moBuild together, okwa ti, ngele elelo lyondoolopa lyina endhilandhilo ndyoka lyoku tembula po etoto, oshi li mondjila.
“Osha kala shetu imbililika kutya ota tu tungu popi netoto. Ihe shika naye shininge meendelelo oshoka ondoolopa ndjika otayi ende yuuka komeho,’’ ta ti ngaaka.
Ta gwedha po kutya oya hala okutembukila momagumbo gawo, onkene shika osha pumbwa okukandulwa po.
“Uunona wetu omo to wu adha moka, shoka tashi ka eta uupyakandhi ishiwe,’’ ta popi ngaaka.
Shikongo ta ti, okwa hala okupandula elelo lyondoolopa sho lya longo nuundhinini okugandja omahala kaakalimo yalyo opo ya mono omalukalwa. Ta gwedha po ta ti, na li tsikile okulonga ngaaka, opo omukalimo kehe mOshikuku a mone ehala lye mwene.
vkaapanda@nepc.com.na