Oilonga yetungo losaala yokumonena ounona koshipangelo shaNandjokwe oyo ya tameka okudja momudo 2017, fiyo opapa ina i pwa.
Omukulunhuwiliki mounisteli wouhaku nonghalo nawa nomayakulo opashiwana, Ben Nangombe okwa koleka ta ti okanyofi otaka anye okupwa shaashi ehangano e li ta li tungu ola taalela omashongo.
Okwa ti ehangano la pewa oshinakuwanifa shokutunga ola taalela omashongo ngaashi oshimaliwa noshoyo oilongifo.
“Ehangano okwa li twe li futa she li kwatelela koilonga oyo va longa po tete,” ta ti.
Nangombe okwa ti ouministeli owe li pyakidila noku kundafana nehangano ta li tungu opo li twikile okutunga lo li mane diva.
“Ouministeli owa tula nale po oshimaliwa momutengenekwa-faneko shokukala sha longifwa okutunga okanyofi kOnandjokwe. Onghee epangelo ota li kwashipaleke kutya okanyofi oka pwa okutunga pefimbo opo ovakainhu veli humbuta vaha mone vali oixuna ngeenge tava ka pulumuna,” Nangombe ta ti.
Okwa yelifa ta ti ouministeli wouhaku owa didilika omashongo aa taalelwa koomeme ngeenge tava kapulumuna koshipangelo shaNandjokwe.
Nangombe okwa ti okanyofi otaka tungwa kogushu yoshimaliwa shidulife peemilliona N$50.
“Mokanyofi ota mu ka kala eembete 160 ngeenge oka pu okutungwa. Onghee okanyofi aka ota kakala oko ka kula moshilongo,” ta ti.
Nangombe okwa ti oshipangelo shaNandjokwe osho shimwe sha didilikwa monooli hashi dalwa ounona vahapu mefiku, onghee naashi osha eta opo epangelo li kale la tunga okanyofi moshipangelo shaNandjokwe.
Okwa didilikwa oomeme ve li humbata hava nangala pondje koshi yomiti ngeenge va ka teelela okupumuna molwashi mewalanda oha mu kala mu yadi.
Ewalanda onhele i li moshipangelo shaNandjokwe hai kala oomeme ve li momateelelo ngeenge ve li popepi noku mona ounona. Oha li kwafele ovakainhu hava di kokule noshipangelo vaha ende vali eendjiladiledile ngeenge tava fetwa.
Omukulunhuwiliki wouhaku moshitukulwa shaShikoto Josua Nghipangelwa okwa koleka ta ti ewalanda ola longululwa paife konima eshi ombelewa ya kala noku lopotelwa ovakainhu ve li momateelelo tava mono oixuna.
Nghipangelwa okwa weda po ta ti oomeme ve li momateelelo ohava nangala pondje koshi yomiti molwashi Ewalanda oli shona, onghee ovakainhu ihava dulu okuwana mo shaashi ovahapu.
fhamalwa@nepc.com.na