Festus Hamalwa
Omupedukomufala koshikondo shokukonaakona oimbuluma yokeengaba moshitukulwa shaMusati okwa ti oibofa yoinima tai vakelwa moshilongo koshitukulwa oko oya londa pombada.
Omupedukomufala Julia Hailaula okwa ti opolifi ohai lopotelwa oibofa ihapu yovanhu tava kwatwa ngeenge va hangika noinima ya dja moAngola ngaashi omahooli, omalodu ouwhiskey, omakaya, oikutu nosho tuu oinima ya yooloka inai pitikilwa mo moshilongo.
Edi Hailaula okwe di popya pefimbo loshikonga shokuninga omapekapeko keengamba oshivike sha dja ko.
Ovanamibia vahapu ove hole oku ka konga ouxupilo moAngola, hava ka konga oinima yokulandifa molwaashi oinima koAngola oi na ombilixa. Ashike ihapu yomoinina oyo inai pitikilwa mo moshilongo.
Ovanangeshefa vahapu ohava pitifa oinima yavo paumbudi tava pitile koshi peemhito odo inadi ufwa okupitila keengamba. Vamwe vati ohava tonyene oinina yavo momakumbafa opo va dule oku i pitifa poshivelo inai monika kopolifi.
Pefimbo loshikonga omukulupe weedula 61 okwa kwatwa po konima eshi a hangika noinima ya kwatela mo oipakete 51 yeexuxwa, omakaya nomalodu ouwhiskey nosho tuu oinima imwepo ya yooloka. Omulumenhu ou okwa teelelwa a holoke momhangu nena.
Hailaula okwa ti opolifi moshitukulwa shaMusati oya tamekele noshikonga shokukelela oimbuluma keengamba omwedi wa dja ko nelalakano lokulela ovanhu tava eta oinima ina i pitikwa moNamibia.
“Ovanhu vamwe ohava twala oinima koushimba opo va ka landife kondado yopombada omanga vamwe ohava landifa moitukulwa yomonooli,” Hailaula ta ti.
Efiku tuu olo loshikonga, Hailaula okwa ti omufekelwa umwe womulumenhu a hangika a londeka ovanhu motuwa yaye va uka moAngola tava kala oinima yavo yokulandifa okwa pewa ehandukilo lokufuta oshimaliwa N$12 000 kehangano loNAMRA.
Okwa kumaida oshiwana opo shi kale tashi longele kumwe nopolifi okulopota ovanhu tava landifa oinima inai pitikwa moNamibia.
“Ovanhu nava xulife po okukala tava eta oinima inai pitikilwa moshilongo molwaashi osha nyika oshiponga ngeenge omunhu okwa kwatwa kopolifi,” ta ti.