Evava lovakulupe voSwapo moshitukulwa shaOtjozondjupa ola kala omutumba mOlomakaya kOtjiwarongo, omo la hoolola elelo lipe.

Ovaleli vopashiwana vongudu yoSwapo ovo ve lile po oshitukulwa Otjozondjupa, Mukwaita Shayengana na Peter Shaanika ovo va li ve lile po omahoololo oo, ovakelelipo veli 42 va dja koitai iheyali moshitukulwa ya kwatela mo Omatako, Okahandja, Okakarara, Otjiwarongo, Otavi, Grootfontein noTsunkwe, va kufa ombinga momahoololo.

Meenghundafano odo a ninga noshikundaneki shoNampa, Shanyengana oo e li omunashipundi wovaleli vopashiwana vongudu ovo ve lile po oshitukulwa shaOtjozondjupa okwa ti evava lovakulupe loSwapo alishe ola itavela nolahoolola omunamido 64 Lukas Hifitikeko oo a dja koshitai shokOtjiwarongo oye a kale hamushanga wevava pashitukulwa. 

Okwa hoololwa yoo omunamido 56 Gustafine Nganjone wokoKakarara a kale omuxwaxwameki, omanga Sylvia Harases ta kala omutonateli woiniwe. 

“Ova hoololwa pambili, inava kondjifwa nande nande, naashi oshe tu hafifa neenghono. Ovo va hoololwa okwa teelelwa va kalele po evava eli oule womido nhano komesho. 

Omukwatakanifi wongudu yoSwapo Susana Hikopua moshitukulwa shaOtjozondjupa oo naye a li pomahoololo opo okwa ti ongudu yoSwapo, pandondo yopashiwana nayo oye li pyakidila noku hoolola noku tula ovanhu peenhele nelalakano oku pepaleka elelo loSwapo pamifika adishe.

Ta ti momudo 2019 oshitukulwa shaOtjozondjupa osha dopa oku kala nomutumba opo shoo shi pepaleke oilalakanenwa yasho vene.  –Nampa