WINDHOEK – Omalelo gopamuthigululwakalo ge li 16 oga kunkilila epangelo kutya etsikilo lyelanditho lyevi kaakwiilongo pehala lyi gandjwe kwaamboka ya kanitha evi lyawo lyooyinakulu otali vulu okweeta ekuyunguto maakwashigwana. Shika oya li ye shi popi sho ya li ya gandja omushangwa gwawo kiikundaneki. Shi ikwatelela komukandanyenyeto gwawo, otashi kumitha okumona epangelo ndyoka lya li lyu unganeke nokuwilika oshigongi oshinene shoka sha li sha ti evi lyuunamapya ndyoka lyi li momake gaakwiilongo nali landwe ko kondando tayi tulwa po kepangelo, olyo ishwe tali kwatele komeho elanditho lyevi kaakwiilongo.
“Otwa kumwa komahokololo ge li miikundaneki shi na sha nelandithopo lyevi lyetu lyookuku kaakwiilongo osho wo ookampani moka iipambuliko oyindji nenge ayihe kaayi li momake gAanamibia, unene tuu mboka ya li ya kuthwa evi koonkondo.”
Omalelo gopamuthigululwakalo ngaka oga li ga totha mo etokolo lyepangelo sho lya landitha po oofaalama ine koshipuna Oshirussia koomiliona N$207 muSepetemba 2018, pethimbo ndyoka kwa li ku na ashike omasiku gaali omutumba omutiyali gwevi gu tameke. Oshinima oshikwawo itaashi kothitha aaleli yopamuthigululwakalo nawa elanditho lyErindi Game Reserve ndyoka lya landwa po koshipuna sha za koMexico Alberto Bailleres.
Ominista yomauyelele Stanley Simataa omwedhi gwa zi ko okwa li a ti nonando epangelo olyo lya li lya pewa tango lyi lande po oshikunino shiinamwenyo shika, inashi ka pita oshoka ondando oya li ya nanena noonkondo.
Omalelo gopamuthigululwakalo ngaka taga ti kage na elalakano lyoku idhenga mumwe nepangelo nando.
“Ashike ngele iinima yi na oshilonga otayi talika ashike, nena itatu vulu ashike okukala omutumba ya tala ko ashike,” omukandanyenyeto tagu ti ngaaka.
Omukandanyenyeto nguka ogwa li gwa shangwa komalelo ngaashi Maharero, Goliath, Ovambanderu, Zeraeua, Kambazembi, Vaalgras, Otjikaoko naVita Royal Houses. Kakurukouje, Kasaona, Ondanga, Mureti, Okakarara, Ovatjimba, Aminius nOtjombinde nayo wo oya li ya Shaina.
Kuyele nuumvo, Presidente Hage Geingob okwa li a ulike okakomisi hoka taka ka simonona oshinima shika shevi lyuuthiga. Inaku monika okomenda ya za kuuministeli wevi nomatalululo moshinima shika oshoka inaya galula omayamukulo komapulo ngoka ya li ya tuminwa.
(NAMPA)