OSHAKATI – Omubiisofi gwongerki yaEvangelical Lutheran Church in Namibia (ELCIN) Dr. Shekutaamba V.V. Nambala okwa ti opo moshilongo mu kale mu na uuyuki, ombili nengungumano, oshigwana oshi na tango okudhimbulula kutya oonzo dhopaushitwe kadhi shi dhoohandimwe.
Nambala ndhika okwe dhi popi kesiku lyokudimbulukwa okulwitha uulingilingi wokulunga itapula, ndyoka hali dhimbulikiwa muuyuni momwedhi gwaJuli, sha li sha ningilwa kendiki lyoUnam mOshakati.
Moshipopiwa she, Omubiisofi Nambala okwa gandja iiyetwapo mbyoka e wete kutya otayi vulu okukala eyamukulo kekalekopo lyombili nengungumano moshilongo.
Mu yimwe yomwaambyoka, Nambala okwa ti evi olya pumbwa okushuna momake gepengelo, kaali kale we lyi li miikaha yoohandimwe. Ta ti epangelo olya pumbwa okutala kutya mboka taya ka pewa evi oye li pumbwa tuu shili, notaya ka eta po tuu shili ehumokomeho, oshoka hakehe gumwe moshilongo a pumba evi.
“Mboka taya ke ya po nomaindilo ge na iiyetwapo iiwanawa e taya pewa evi ya ete po ehumokomeho, andola otaya kala owala ye na uuyene waashoka ya tula po, ashike hawevi mpoka ya tungila,” Nambala ta ti.
Omubiishofi okwa pula wo epangelo li shonopaleke iimaliwa hali gandja koondjambi dhaaniilonga, ta ti oshimaliwa shoopelesenda 75 sigo 80 shomayalulo gepangelo, nashi longithwe kehumokomeko ihe hakoondjambi, ngaashi shi li ngashingeyi.