ONGWEDIVA-Ewo lomeva la shivika nawa nedina Ruacana Waterfalls moshitukulwa shaMusati, ola tameka okunana ovapashiyoni vahapu konima eshi eendama domeva da patululwa okudja moAngola oshivike sha dja ko.
Omeva paife okwa tameka okukunguluka efimbo keshe taa di moAngola.
Onghee eshi otashi nane ovanhu vahapu okudja meni nokondje yoshilongo va talele po oRuacana Waterfalls.
Okudja ketameko loneudo, okwa didilikwa ewo lomeva koRuacana la kala itali nane vali ovanhu.
KoRuacana Waterfalls okwa kala ku na oshikukuta nokuhe na omeva taa kunguluka ngaashi sha kala shito.
Ruacana Waterfalls onhele ya didilikwa hai nane ovapashiyoni okudja meni nokondje yoshilongo.
Omunashipundi welelo loshitukulwa shaMusati Andreas Shintama okwa ti Ruacana Waterfalls oya fimana koshiwana shomuhoko wOvahimba molwaashi ohashi mono oyuuyemo okudilila ponhele opo.
“Ovapashiyoni ohava futu oshimaliwa Ovahimba ngeenge tava fanekwa navo. Ohava yandje yoo vali noikulya kOvahimba shaashi ovanhu vahapu ove hole okuyambidida Ovahimba,” Shintama ta ti.
Shintama ou e li yoo vali onga kansela woshikandjohoololo shaRuacana okwa ti ngeenge okwa monika oshimaliwa onhele yoRuacana Waterfalls otai ka kala ya longululwa.
Tuvatera Kamazu omukwashiwana a dja momuhoko wOvahimba oha tonatele onhele yomalihafifo i li pomulonga waKunene, okwa kufila ko Oshikundaneki eshi ta ti mexuliloshivike ova yakula ovapashiyoni vahapu konima eshi omeva a tameka okukunguluka.
Kamezu okwa ti poshivelo omunhu keshe oha futu N$10. 00.
Okwa weda po ta ti okudja mexuliloshivike ova longa N$270.00 ashike shito ohava dulu okuninga nande omafiku atano inava mona omupashiyoni.
“Ohatu hupu moshimaliwa osho hashi futwa kovapashiyoni komuvelo. Onghee ohatu pandula ngeenge hatu mono ovapashiyoni vahapu shaashi ohave tu fiile oyuuyemo,” ta ti.
Ovapashiyoni va dja koMariental Willemine Iilonga naHendie Van Wyk ova lombwela Kundana tava ti ove ya kewo lomeva konima eshi va mona ouvidio vomeva taa kunguluka okupitila komalungula.
“Ruacana Waterfalls onhele iwa notai monika nawa. Olwoshikando shotete handi ende kewo lomeva,” Iilonga ta ti.