Taimi Haihambo   

Vitoria Kaapanda

Opolifi oya lopotelwa nokupatulula oibofa yomafyo yovanhu ve lidipaa nokudipawa moiningwanima ya yooloka. Moonakufya ava omwa kwatelwa yoo ovo va xulifa moiponga yoihauto. 

Omadipao

Omupopiliko wopolifi moNamibia Kauna Shikwambi okwa ti omulumenhu wedula 27, okwa tulwa moipandeko eshi vati a dipaa inakulu naxekulu nekuva. Oonakufya vati ovo Hamukwaya Clemens weedula 79 osho yo Mukuve Maria Kakove weedula 84.

Moshiningwanima sha yooloka Sarah Muzorongondo omukainhu weedula 28 natango okwa lopotwa a dipawa kukaume kaye kopaihole moRosh Pinah konima eshi vati kaume kaMuzorongodo kapaihole “omefekelwa” a ya konduda yaMuzorongondo a ka tale mo oinima yaye. Konima vati ovashiinda ova uda ashike eenghuwo tadi dilile monduda yavo. 

Ovashiinda eshi va ka kendabala okuya mo, vati onduda oya patwa. 

Konima omumwainamati womufeekelwa vati okwa ka kufa emanya ta denge po omuvelo, nokonima okwa ka hanga Muzorongodnoe e li mondabo yohonde, nomufeekelwa a nangala puye e li monghalo ihe li nawa. 

“Omufeekelwa okwa twalwa koshipangelo shaKeetmanshoop, noku li momake opolifi,” Shikwambi ta ti.

Omalimangeleko

Natango opolifi oya lopotelwa omafyo omaikufomwenyo momukalo welimangeleko koshitukulwa shanooli. 

Moshiningwanima shimwe olutu lihe na omwenyo lomulumenhu weedula 32 ole lituwa kounona vati mOshakati, koshi yomuti la mangelwa momalapi a pomboka. 

Ou na vati eshi va mona olutu ova faduka po opo vaka lopote oshiningwanima kuxekulu, yee xekulu ta shivifile opolifi.

Olutu lomulumenhu weedula 67 natango vati ole lituwa kounona lihe na omwenyo mokati koixwa moshitukulwa shaShikoto. Nakufya vati okwa fiya po onhumwafo ya hangika meendjato dombulukweva yaye.

Omukainhu weedula 68 naye okwe limangeleka moEtayi, moshitukulwa shaMusati. 

Nakufya vati okwe lixulwa kokamonakadona Etitano keevili dokomatango. Okamonakadona eshi ka alukila keumbo olomakaya vati oka hanga ina e limangelekela mokombifa.

Omalutu oonakufya aveshe okwa twalwa keekila dopopepi neenhele apa ve limangelekela.

Oiponga yoihauto

Oiponga yoihauto ya holoka mexuliloshivike oya twaalela eemwenyo dovantu va fika puvatano.

Imwe yomoiponga oyo oya etwa kovashingi vehe na omikanda dokushinga, omanga vamwe vomovashingi taku hokololwa kutya ova li koshi yodungo.

Omulumenhu womido 44, okwa xulifa Olomakaya eshi ohauto oyo kwa li ta shingi yoToyota Rav4 ye lidhenge mumwe notuukala yoToyota Corolla. Oshiningwanima osho osha holoka lwopotundi 19h00 ponhopa yopUupindi mondjila yokuya kOkahao.

Nakusa vati okwa li mo novatwaalewa ve li vahamano. Otaku hokololwa kutya ohauto oyo oya alangata ko lumwe, ndele omushingi ta umbwa mo nokufila pohele yoshiponga. 

Ovatwaalelwa ova mona oiponga neenghono.Omushingi woCorolla opamwe novatwaalelwa vaye ye navo ova ehamekwa unene. Okwa lopotwa natango omulumenhu womido 41, Etitano a lyatwa nokufya efimbo olo koKavango West. Nakufya okwa shivika nedina Karumbwena Vigilius Hausiku. Opolifi oya hokolola kutya Hausiku, oo a li pamwe nounona vaye vatatu okwa li ta kongo eelefa ngeno a ye koGrootfonein. 

Eshi ngeno aka tauluka opate a ye kombinga oko ku na ohauto oyo a lefa, ya thikama ye mu teelela, okwa dja ohauto yoPolo ndele tai mu lyata. Opolifi oya lopota yoo okamatona komido 17, ka xulifa eshi omushingi wotuwa oyo kali ka londa a nyengwa oku pangela osheendifo, ndele tashi alangata.

Oshiningwanima osho osha holoka konima yondjila yeshina lokolutenda koKaribib.

 Opolifi oya ti nonande kwa li kwa ningwa onghendabala a ka mone epango, okwa hulifila mondjila okuya koWindheok. Omushingi ina mangwa po.Natango okwa lopotwa omulumenhu womido dopokati a xulifa eshi a umbwa motuwa noku pitila mekende lokomesho.

Oshinigwanima osha holoka Etitano pOkandjengedi. 

Otaku hokololwa omushingi ali e li koshi yoikolwifa, ye vali ke na omukanda wokushinga.

Nakufya okwa tongololwa kutya oye Sem Nangodji Jekonia.

-taimihaihambo2000@gmail.com

-vkaapanda@nepc.com.na