Taimi Haihambo
Kansela wokoshikandjohoololo shUuvudhiya Timoteus Shivute okwa ti, moule weedula nhano odo a kala koshipundi ongakansela woshikandjohoololo shUuvudhiya okwa kendabala okweeta omaxumokomesho, osho yo omakwafo kovanhu apa ta dulu.
Shivute okwa ti eshi a kala koshipundi, okwa kendabala lela okuundula koikondo ngaashi, ehongo, ouhaku, eepate osho yo omalusheno.
Okwa tameka kutya ngeenge tashi ya koshikondo shehongo, oshikandjohoololo vati oshi na eefikola dil li nhano. Meefikola nhano, nhee domudo odi na ashike fiyo ondodo onhimuwoyi.
“Onda kendabala opo ndiye koshikondo shehongo ndi keva kwenene, fiyo imwe yomeefikola yedina Onaushe, ta iya fiyo ondodo o 11. Modula tai ngeenge aishe oya ende nawa, epangelo ota li etapo ondodo o 12 pofikola opo,” ta ti.
Vati osha ninga oilonga yovanafikola osho yo ovadali ipu, shaashi ihava mono naana vali oixuna ngeenge tashi ya, peendodo edi dakula.
Shivute okwa ti ngeenge tashi ya keepate, oshikandjohoololo osha mona opate yakula, oyo ya kwatakanifa nomikunda dihapu.
“Onetiwork nayo oya kala lela oshimbide shakula, ashike otwa undula fiyo hatu mono etenda lonetwork, ei hai lotoka nawa, notai longifa ovanhu noupu,” ta ti.
Oshikandjohoololo natango vati osha tungilwa eendama domeva dafika punhee. Eenhele edi dali hadi di omeva, ndele tadi fufalapo, nado vati oda lafululwa nota di yandje omeva a wana kova kwashiwana.
Ngeenge tashi ya pouhaku, moshikandjohoololo natango vati omu na okapenngelo oko haka kwafa oshiwana.
“Natango ope yo edu la yandjwa, opo oshikandjohoololo shi tungilwe okapangelo kape, okudilila kouminitseli wouhaku, unene ngaashi ovakulupe, osho yo ava ve na oulema wa yooloka, ohava mono oixuna pefimbo lodula,” ta ti.
Shivute okwa ti yo ngeenge tashiya poukoshoki, natango epangelo ole li pyakidila nokutungila ovakulupe, eefiye osho yo ovanhu ava ve na oulema wa yooloka, opo va tungilwe oundjuwo.