Aakwashigwana osho wo opolisi miitopolwa yokonooli oya taalela omaupyakandhi giimbuluma, mbyoka tayi ende tayi indjipala, noya pimbila ethimbo ndika lyuuka pomatango manene.
Aapopiliko yopolisi miitopolwa ayihe yokonooli oya ningi esiku taya nyenyeta iimbuluma tayi indjipala.
Aafuthi otaya longitha ompito kehe okuyuga aakwashigwana iimaliwa yawo, iihauto oshowo okuteya omagumbo.
Taya ti, oshigwuana otashi yugwa iinima yawo esiku kehe, yamwe otaya kondokelwa momagumbo kaafuthi.
Opolisi oya indile oshigwana shi kale aluhe shi na oongodhi dhopolisi oshowo dhaashinda opo ya vule okulopota mbala yo ya mone omayakulo.
“Otwa kala nokukumagidha oshigwana shi hulithe po okunana iimaliwa koomuma. Uuna gumwe a hala okulanda na kambadhale okulongitha uumbomba pamukalo gwoshinanena,” taya kumagidha ngaaka.
Ta yati, okwa li wo ya kumagidha oshigwana shi kale tashi ningi omaindilo kopolisi, opo yi kale tayi thindikile oshigwana uuna taya ka nana iimaliwa oyindji.
Opolisi oya ti, ndika olyo ethimbo ookalyamupombo taya longo ya itula mo onkene oshigwana inashi pumbwa okukala sha kotha tashi mbonyoka.
“Okupitila momalungula ga yooloka otwa kala nokupopya iiningwanima tayi longwa kaafuthi oshowo okukumagidha oshigwana nkene shi na okwiihumbata, ihe natango otatu lopotelwa iiningwanima yoludhi ndoka,” Opolisi tayi nyenyeta ngaaka.
Omaandaha goshiwike shika omukiintu gumwe okwa ponekelwa mondingosho kaafuthi molukanda Uupindi mOshakati.
Otaku hokololwa kutya iimaliwa mbyoka inayi shiwika natango kutya ingapi ya yiwa nayo ontuku kaafuthi.
Etitano lya ziko omukiintu gumwe mOshakati okwa yugwa kaafuthi oshimaliwa shi thike poN$7 500.
Opolisi yaShana otayi kumagidha oshigwana shi longele kumwe nopolisi okumanga aafuthi mboka oshowo okulopota mbala una sha mono iilonga yi li ngaaka tayi holoka.
Tayi ti aantu mboka oya pumbwa okumangwa opo ya ze mo mokati moshigwana.