WINDHOEK- VaNamibia kuna vagumu mukarodona ogu guna kuhoroka nkenye kwedi nsene asi kapisi nkenye ezuva. Vagara vatunga mosirongo esi kuna kureta utjirwe, keparu lyovantu morwa nkenye gumwe kuna kulipura asi yinke yina kuhoroka eyi vana kudipagera vakadi novanona ngesi. Pwanare kapisi yimo ngayihoroka ngesi ntaantani yina dinda, omu yina kara asi mugara kudipaga tupu mukadi googo ana dipanga yige mwene hena gokutantera vaporosi asi wizeni muyaharenge ame nadipaga muntu. Kapi yina kumoneka nawa nampili nakauke morwa konyara nkenye sivike tozuvhu asi mugara ana dipaga mukadendi ndi mukadona gwendi. Kwavanye avaranda nosayitunga ndi vakara nonoTV, hawe nkenye ezuva kuna kuyitara asi yinke mpamwe yina kuhoroka. Morwa kuna kara ngwendi udano nogu ana dipaga mbwa hansa, morwa nalipura asi yinke ninadipagere mbwa zamukwetu. Ano kudipaga mukadi kapi yina kara ngoso ntani vahahende vamwe kuna kuvamona asi awo kwakarerapo nkenye muntu nye muntu anadipaga mukwawo ngapi nomukarerapo asi atunde monomango.
Nosayitunga, sivike kasipwire kadikere tadigava nombudi asi mwankenye mukundahorowero vangapi vana dipaga ntani ngapi kaligendere edipago olyo.Uwa nampo tutare asi mukaro gwangesi gwahahoroka hena nye udigu kuyikeverera morwa simpe kapi tuna gwana asi udigu nampo yinke. Ano gumwe kuna kutanta asi mukadona ogo kanidipagere gwange ntani eyi namupa yinzi unene kapi nina hara asi nizumbanese ngorooro makura nahepa nage kumutengeka. Nye pwanare omu yakere, muntu ogu ana kunyoka mukwawo akare asi mukadi ndi mugara gahepa kufuta manyokero ntani kapisi manyokero gelike kutara hena asi yinke yene oyo galya ogo muntu nokutengwida yininke yamukwawo.Ntaantani kwato oyo, nampo gumwe eyi katente asi eyi ana kugazara kukadipaga mukadona ogo, morwa valitumbwidira asi ngavalikwara ano kutarako tupu asi ame nina nyoka. Moomo mosiruwo ana kuuyunga asi ninanyoka, nare ana purako hena mumati gumwe nokutantera ogo ana nyoka asi ame nina kunyoka ngesi ogu yige nina purako nye. Vakadona ndi ava vana kurugana yangesi, tupureni vakurona vetu omu ngava yirugana, muntu nsene kuna kumona asi ogo mugara ndi mukadi kapi ono muhara kutanta tupu asi ame kapi nina hara hena. Kapisi omutware asi kapi nina hara ngesi ogu yige nye nina purako. Ntani egano limwe lina kutunda monkarapamwe asi vakadona tutjireni kulya yininke yovantu ogu ono mono asi ogu mugara kapisi gwange kwato vakurona woge vakupulisira asi likwareni. Ntani vagara none mwahakara tupu asi kapi omutara omu muna kuruganesa emona lyeni. Vagara none kuna kara asi taniyirugana makura nepu ngapa wiza udigu egano kukara tupu asi tanidipaga mukadi ogu yipo yiwape. Nani nye kapi yina wapa, nomukaro kwakara mbali, kudiga nzo kwaKarunga, ntani kukara muntu ogu ngavatjira vantu siruwo nasinye morwa kapi ngavadiva asi ngesi ono wapa ndi simpe omudipagi. Vamwe apa vana kurugana yininke yangesi yokulidipaga vana vawo wovanona kuna kutara. Makura omu ono kugazara asi ngayitundamo momutwe gogo munona nsene asi kapi muna kumutekura nawa one etekuro lyeni kuna kudipaga tupu vantu. Nawa ngoso nsene asi vantu tutengura komukaro gwina twakere nago asi kudiga nzo. Ano pwantani kuna kuyimona ngwendi kudipaga kuna kara nye yininke yoyipe.
Sinzi setu kuna kupandura eyi epangero lyetu kalitulirepo elikwamo lyomakanderero. Konyara vantu ava vana kumona asi eli kapisi elikwamo lyewa kavabubukire vaze vakakanderere. Nye vamwe kuna kutanta asi owo vana kuyirugana kapi kavakerepo. Kutunda kwaPresidente gosirongo dogoro nankenye mpitisili hawe vantu kavapongere nomu kavageve asi nongenzo dahepa kuhagara yipo nkenye muntu gahepa kukanderera karuwo kokasupi. Nye nombudi kapi kere asi mezuva lyoolyo vana kukanderera yimpagwa yokuhamena kedipago ndi ketoono vakadi kayihorokere. Vakadi ndi vagara mwahakara asi ame kapi nakara ngoso, ano unene vakadi hagekeni kuparuka momugara ogu ono diva asi nkenye apa kuvhura nimuzumbe ame nikapureko mugara nage peke. Ntani hagekeni vampanza vetu kulya yininke yovantu ndi mukaro gwina asi mukadi nage kukara novagara vatatu ndi vane ngoso. Masupareko kwakara tupu kovagara kapisi vakadi.