Ehangano lyiikulya nuunamapya (FAO) lyazizike ondoolopa yEenhana okupitila moprogalama “Green Cities Initiative” sho yatsike omiti, iimeno niikunino mondoolopa yEnhana mehuulilo shiwike. 

Ehangano ndyoka olya yambindhindha niimeno oshowo iikwathithi ya yooloka, oombuto dhiikwamboga nomiti, omiti dhiiyimati oopomba dhosolar nikwawo yilwe, ayihe kumwe kongushu yoshimaliwa N$630 000.

Omukalelipo gwehangano FAO, Qingyun Diao momushangwa gwe okwa popi kutya ehangano lyawo olyina oshisho okuzizika oshowo okumonitha nawa omindhingoloko okupitila momukalo gokuandjaneka omiti oshowo okuyapo niikunino. “Etsiko lyomiti ndika otali eta elunduluko momudhingoloko gwEenhana, otali shonopaleke elunduluko lyonkalo yombepo no tali wopalekitha omundhingoloko gwondoolopa,’’ ta fatulula ngaaka.

Diao okwa ti okupitila momukalo ngoka otaya hwepopaleke noku kandula po ondjala sho iipalutha tayi ndulukwa momindhingoloko.

Ta ti, etompelo enene okukandula po ondjalo, okukalekapo uundjolowele oshowo okuipalutha niikwamboga.  

Diao okwa gwedhapo kutya ayihe mbyoka ya gandjwa oyina omauwanawa gayooloka tagaka  yambindhindha oshigwana shEenhana.

Mayola gwondoolopa yEenhana Omri-Onn Kavandje okwa ti, inashi simana ashike okuopaleka oshitopolwa shoka, ashike omiti ohadhi dhana wo onkandangala momindhingoloko.

 “Omiti odha pumbwa okukunwa odhindji, omolwa uuwanawa woshigwana oshoka omiti odhina omauwanawa ogendji,’’ ta ti ngaaka.

Mayola okwa kumagidha oshigwana mondoolopa yEenhana shi sile oshimpwiyu omiti ndhoka tadhi tsikwa, nelalakano lyokukaleka ondoolopa yEenhana ya opala oshowo okugandja ombepo ya gwana. 

Kavandje esiku ndyoka, okwa kumagidha oshigwana shi tsikile okukuna omiti odhindji opo oshigwana shokomongula shi adhe ondoloopa yEenhana yi li methano tali hokitha.

“Omiti odha simana, onkene odhi na okusilwa oshimpwiyu opo dhi kalwekwe po. 

Oshigwana osha pumbwa okukala tashi tsike omiti odhindji, ngaashi naanaa sha ningwa,’’ ta ti ngaaka.

-vkaapanda@nepc.com.na