Ehangano lyokunduluka iikulya yiimuna, olya gandja omadheulo kaanafaalama yiikwamawawa ya thika po100 oshali shamuhongi mOndangwa.
Omadheulo ngoka oga longo aanafaalama nkene ye na okwiindjipaleka iiyemo yawo okupitila moongeshefa dhiikwamawawa. Aakiintu oyo unene ya kutha ombinga momadheulo ngoka.
Omunawino mehangano lyoFeedmaster Frank Kanguatjivi okwa ti oya gandja omadheulo ngaka moshitopolwa Kunene notaya ka hulila koKavango West.
“Otwa ndhindhilike kutya oyendji oya tameke ashike uunafaalama wiikwamawawa oshoka aashiinda yawo nayo oye na iikuku yoondjuhwa, ihe kaye na ontseyo, nomolwaashoka tatu gandja omalongo ngaka,” ta fatulula ngaaka.
Kanguatjivi okwa li a kumagidha aanafaalama yiikwamawawa ya longithe oompito dhomadheulo kehe opo ya tseye shoka tashi humitha komeho oongeshefa dhawo oshowo okuyanda omashongo taga vulu okuholoka.
Omudheuli Beata Mudjanima okwa kumagidha aanafaalama ya kale ya kotokela omikithi hadhi vulu okuponokela iikwamawawa.
“Omaudhelo ngaaka oga kwatele mo omalongo nkene iikwamawawa hayi vulu okukwatwa kuunkundi naashoka shi na okulongithwa yaa kwatwe,” ta fatulula ngaaka. Okwa ti omikithi ndhoka hadhi vulu okukwata iikwamawawa ongaashi Newcastle, Infectious Bronchitis, Gumboro, noFowl Pox, ndhoka hadhi yi kwata unene ethimbo lyomvula.
Ta ti, okutekula iikwamawa kaku shi kaantu aanyenge, oshoka ohaku pula omuntu e na ohokwe noonkondo ethimbo alihe.
“Ope na oondjuhwa dhi li pamaludhi, ope na ndhoka hadhi tekulilwa ashike okuninga omayi, omanga dhimwe odhokulya ashike,’’ ta fatulula ngaaka.
Mudjanima ta ti oondando dhoondjuhwa ohadhi kala noondando dha yooloka, omolwoongushu dhawo, naasho dha tekulwa. -vkaapanda@nepc.com.na