Lucie Mouillaud
ǀAEǁGAMS – Onkugo Yepongo ǀhûhâsib Sali Okuriangavas dib ge kaise ge ǁaxa i ǂoago wekheb Fraitaxtsēs ai, ǁnāpan ge Tobias Hainyekob ǁhûi!nâǂharis !nâ xoamâisa khoena ǁîn di ǁkhâkorobe xawas di ǂûna si gere ūǁnâ ǁaeb ai. ǂÛn ǀgâsib ge 3.2 persentgu ǀkha ge ǀoro !kharu ge 12 ǁkhâgu !nâ ti i ge Harambee Prosperity Plans (HPP) ǀgâsiba !kham!oas di ǁkhawa kō!gâs !nurib !nâ ge !gā!gāhe. ǁNā !khaib ǂûn ra sâu!nâheb xōǀkhāb ge kai!gâ autoba ge mâ i. ǁNā sâu!nâ!khaib ǂganagan ge ǂgui !gôab di ǀnai a aiǂhomitoasa ǂûn!gaeǀkhārode ge ǂnôa i, ǀgoraǂuis ǀguisa !âu hâse. ǁKhātin ge māsenxase gui ra sîsen khoena ǀgaisase hoa ǂûn a ǂgāsa !khaisa ǁawoǁawos ǀkha ge ǁaxa i. !augab ain ge ǂauna !gôab khoena !amkuse raigu !nâ ge mâ i, ǁîn di ǂûna ǀasa ǁkhâb !gao ūǁnâs !aroma.!Kharu ge ǀgam kurikhas ge Ministeris ǀGâsiba !kham!oas tsî ǀHûsi !Oabadisa nē ǂûǀhaoǀhao tsî ǀgoraǂuis proxrammi ǀkha ǀAeǁgams !nâ ǂguro !nās ase ge tsoatsoa. Mâ ǁkhâb hoaba i ge koro tsēdi !aroma māsenxase guis khami ī mātare-e !khō!oa tamase ra sîsen khoena hâ hîa nē sîsenni ǀkha ministerisa ra huina. ǁÎn ge !nāsase ǀAeǁgams di ǂnaumâi ǁanǁguigu !nâ ra ǀgoraǂui tsî xawe ǁnān hîa nēti ī ǂûna xu nî domdorese a xoamâisan ǀguina. Nēti ī khoen ge ǁkhâkorobe hōǂgāsa N$400 xa !nāsase hō tama hâ. ǂÛn di !gaeǀkhādi ge buinkin, mel-i, oli-i tsî ǀnî ǂhâhâsa ǂûn hîa ǂhâǂhâsa !âsa ra ǀhurun tsî mâ-i di ǁhōb tsîna !khōǂgā hâ, xawe mâtikō !gaeǀkhādi tsîiǁhōgu tsînas ǀgui omarisa nî !khō!oas ge mâtikō sîsen tamase ǁgoe khoen ǁnā omaris ai hâsa xu hâ. ǂOago kurib di ǀams ai ge hâ i ǂhaitsi māǂuis kuriba ǀamǀams !aroma mâtis ge HPPsa a !gûǁnâs di !nuriba mās !nâb ge, Presidenti Beros !nâ sâuǁkhāsib ǀawemā-aose ǁgaumâisa mâisaba ge mî, ǂûn ǀkha ǀgâsiba !kham!oas !gôab ge 9.0 persentgu aib ge 2003/4 marikurib ai mâ isa xu 2015/16ǁî marikurib !nâ 5.8 persentgu kōse a ǁgôaxasa.