Omupopiliko wopolifi moshitukulwa shaMusati Inspector Anna Kunga okwa ti fiyo opapa opolifi inai lopotelwa oshimbuluma sha holoka komauliko opaipindi noshivilo shOlufuko osho shi li mOutapi, osho ta ti holola kutya oshiwana ota shi li humbata nawa.
Okwa ti opolifi otai kwashipaleke okukaleka po eameno loshiwana efimbo keshe opo ku kelelwe oimbuluma. Oshivilo shOlufuko osho hash inane ovanhu omayovi nohashi kala mendiki lOlufuko modoolopa yaUtapi .
“Okudja ongula fiyo oufiku opolifi oye li pyakidila nokuninga yandja eameno noku ninga oikonga molufuko,” Kunga ta ti. Okwa ti omunhu keshe ta ka monika ta longo oshimbuluma ota kwatwa po diva opo a ninge oshihopaenenwa sha vakwao. “Opolifi oya hala ovanhu va kale ve li meameno, tava landifa oilandifomwa yavo pehe na oumbudi,” ta ti. Olufuko ola tamekela oshivike sha djako kOutapi nota li ka xula momafiku 2 Juli.
Oukadona 85 va dja koikadjohoololo ya yooloka otava kufa ombinga okufukala kolufuko.
Kunga okwa ti opolifi oi li kolufuko tai yandje omayakulo opashiwana ngaashi okudengifa oiyako nosho tuu omayakulo a mwepo ya yooloka.
“Oshiwana nashi talele po okatala kopolifi opo shi pewa omayakulo opashiwana,” ta ti.
Okwa ti kolufuko oku na yoo va li eembelewa deeministeli da yooloka tadi yandje omayakulo koshiwana ngaashi ombelewa yokuyandja omaufemba, ombelewa younamapya tai yandje ouyelele kombinga younafaalama.
Inspector Kunga okwa indila oshiwana opo shiha twalele oilwifo kolufuko molwashi oku na eameno la wana.
“Omunhu keshe ta ka mona oshimbuluma tashi ningwa kolufuko na lopotele opolifi keshe i li kolufuko. Ina tu hala ovanhu va kanife omaliko avo pefimbo lolufuko,” ta ti.