Charles Ndeumane
OSHAKATI – Ombaanga yoFirst National Bank (FNB) Namibia onkene tayi ulike eitulemo lyayo mokuyambidhidha oshikondo shuuhaku nonkalonawa yAanamibia sho ya gandja omakwatho koshipangelo shaShakati lwoshikando oshititatu nuumvo.
MEtiyali lyoshiwike shika, FNB Namibia okwa gandja uumpunda womasita tawu ithanwa haemodialysis catheters wongushu yoshimaliwa shoo-N$110, 515 koshipangelo. Haemodialysis catheters uumpunda hawu longithwa miipangelo okupingena po nenge okukwathela iiti yanathigo okudhinda nokupomba mo oonyata molutu ngaashi iimongwa ngele iiti yanathigo itaayi longo nawa kuyo yene.
Omunambelewa gwa-FNB Namibia monooli Abongile Mpikwa okwa ti FNB Namibia okwa ndhidhilike nota yambidhidha oonkambadhala dhepangelo naunene uuministeli wuuhaku nonkalonawa, onkene omakwatho ngoka oga nuninwa okutsakaneka epangelo ondjilakati.
“Omimvo dha piti odha thitha uundjolowele wetu neinekelo lyetu momikalo kaatwa li twe dhi tega. Otwa taalelwa komwaalu gwaantu kaaye na iilonga tagu londo, onkalo yoluhepo tayi londo, oshowo omashongo galwe ngoka ga taalela oshikondo shetu shuuhaku. Nonande omashongo ngoka ogendji, opu na aantu oyendji yi itula mo mokukwathela mboka ye li mompumbwe,” osho Mpika a ti.
Omutaleli gwoshipangelo shepangelo shaShakati Dr. Ruben Kanime okwa taamba ko omakwatho ngoka nomaako agehe nokwa pandula FNB molweyambidhidho lye, ta dhenge wo omuthindo komayambidhidho galwe ngoka FNB a gandja koshipangelo shoka momathimbo ga piti. “Omukithi gwiiti yanathingo itaayi longo nawa otagu ende gu uka pombanda omathimbo ngaka, onkene omayambidhidho ngaka oge ya pethimbo ga pumbiwa meendelelo shi oshipangelo shetu sha taalela ompumbwe onene yiikwa niipangitho moshikondo shuudhindoli,” Kanime a ti.
“Oshipangelo shepangelo shaShakati ohashi yakula omwaalu gwaantu ye li omiliona 1.2. Oshikondo shetu shuudhindoli shoombete 15 shoka opo sha gwedhelwa otashi longo nuudhigu omilandu ndhoka ha dhi ende kashona, omalunduluko gomikithi, noshowo omwaalu gwaavu tagu lunduluka ethimbo alihe. Omashongo agehe ngaka oge shi ninga oshidhigu noonkondo okugandja epango kaavu koshikondo shuudhindoli,” osho Kanime a popi ngaaka.
Kanime okwa indile omahangano noongeshefa dhilwe dhi yambidhidhe oshikondo shuunamiti ngaashi tadhi vulu opo dhi pate omwaka mpoka epangelo tali nyengwa.
– mrndeumaneraycharles@gmail.com