ǀAeǁgams
Sa oms ge ǁîs hoan xa a kai ǁguiris hîats a ūhâ ǁkhāsa, tsîn ge ǁnā-amaga ǀnî omǀhonkhoena aitsama ǁîn om-e ǁamaxūbasens mîǁguiba a ū ǁkhā, omna ǁamaxūs ǂansa ūhâ khoena sîsenūs soas !nâ. Xawe om-e ǁamaxū-i ge supu tama dao-e, ǂan tamats nî īs kara, ots gaxu daob ai satsa marisa a ǂoa!nâ ǁkhās di īǁkhāsibas ǀgaisase !khōǂgā hâ amaga tsîts nî ǀoasa tsî ǂhanu ǂansa aibe ǀhaoǀhaobasense ī.
“Sa omsa ǁamaxūs ti i nî hās kara, os ǁîsa a ǁnaetisa tsî ǂhanuse ra !gawaǀîhe ǀgaub ge omna ǁamxūs ǂansa ūhâ khoe-e ǀgūǀkhāsa,” tib ge Thomas Slabberti, FNB Namibiab marisâuǂgaes tawa ǀKhuwimari !âb Omdi di Danaba ra mî. “Īǁkhāsib ge hâ sa omsa aitsama ǁamaxūs !nâts a !gâi!gâ ǁkhās diba, xawets ge ǂōrisa ôa!nâde dī tsî nî ǁawoǁawo marisats ǀgaisase ǂoa!nâ tidesa.”
“Omde ǁamaxūs sîsenna ra dī khoen ge ǂans ǀkha ǂnôa !hūsâuǁkhāsib ǂnamipe, xoakhâib onma ra ǁama ǂgao khoen diba ūhâ, ǁamaǁamas ǀgaisa ǂans tsî ǁkhāsiba ūhâ. ǁKhātin ge ǁaeb hoa xūna dība tsis dib tsî ǁama ǂgao ra khoena omde ǁgaumas dib tsîna ūhâ, sats amase sîsents nîs karao ǁae-e ūhâba tidena. ǀUnis ain ge omde ǁamaxūs sîsenna ra dī khoena hoaragase tsoatsoasa xu ǀams kōse nē oms ǁamaxūsa !khōdana tsî !gûǁnâ kaiba tsi ǁkhā, ǂkhani sîengu nēs ǀkha ra !gûǁarega dī tsî ǁama-aon ǀkha ǂganǀgaugu tsîna a ǁnâugu ǁkhā,” tib ge Slabberta gere ǀaro. Xawets nēn hoan khao!gâ noxopa ǀgaisase sa omsa aitsama ǀguri hâse nî ǁamaxū ǂgaos kara, on ge sao rase ǀnî khami ī xūna hâ ǂâis !nâts nî omǁamaxūs !aroma ūhâbasense īna:
ǂHanu ǁamaxūmarisa ǂnûis
Aibets ge ôa!nâde nî dī ǂhanu ǂganǀgaub ǂnamipe ǁamaxūs !aromats omsa nî ǂanǂans ai!â. “ǁNāpa gu ge ǂgui!nâgu !nuriga mario!nâse ra māǂuihe, satsa hui!nâs ase ǂhanu ǂganǀgauba ǂnûis ase, tib ge Slabberta ra mî. “Sa ǂganǀgaub nî kaise ǀgapis kara, ots ge sa oms ǁamaxūsen ǁkhā tide mâsib !nâ ra mâisen tsîb ǂganǀgauba kaise nî ǂams karas tsînats ge sa ǂoa!nâsa aitsama ra !aroma.”
Sa omsa amaǁamas
Sa omsats nî ǁamaǁamas kara ots ge !amku sîsenna nî dī tsî ǂansa ūhâ īsi!khōǁnâ-ao-e ǂhâba hâ. ǁÎ-i ge ǁkhāti mâ īsib hoab di xoaǂnamisa nî mā. Nē gamra khao!gâts ge mâpats sa ǂanǂansa nî ǂgāsa nî mîǁgui, ǁama-aona ǂgaes !aroma. Nēs !nâts nî !gâi!gâs kara ots ge ǁamaxūs tawa ra sī tsî ǀams ai ǂkhanina xoa!gaos tawa.