MAKURI – Oshigwana shAaSan yomomukunda Makuri gu li lela kuushayi moshitopolwa shOtjozondjupa otashi lala inashi kotha molwomiti dhomikwa dhomomukunda gwao ndhoka tadhi hanagulwa po koondjamba. Omuti gwomukwa ogwa talika ko ongomuti gwomwenyo, ihagu gandja owala iikulya niihemba kaakwashigwana, ashike ogwa talika ko wo ongedhidhiliko enene ndyoka hali pukulula aakongo yaaJu/’hoansi mboka ye li oludhi lwAasan ngele taya ende momuthitu.
Ashike sho onkalo yombepo tayi lunduluka yu uka kuuwinayi, omikwa odhi li muudhigu woondjamba ndhoka tadhi teyagula nelalakano lyokukonga omeya. Omukwa ogwa shitwa gu na ekololo ndyoka hali kankama omeya, nongele oondjamba kadhi wete mo omeya momadhiya ohadhi hoko omikwa opo dhi vule okunwa mo omeya ngoka ga yengala mekota.
Ashike kaanamukunda mbaka, ehanaukopo lyomuti gumwe kagu shi owala ekanitho lyomuti, ashike ekanitho wo lyuuthiga nomuthigululwakalo ngoka gu na omindhi dha kola.
Oshigwana shaaJu/’hoansi shoka shi li moMakuri, omukunda ngoka gu li konyala ookilometa 60 okuza moTsumkwe, oya kala momuko gumwe nuushitwe uule woomvula odhindji. Kaakwashigwana mbaka, omuti ngoka gu li onga oshungo hayi pukulula aaendafuka, ogu na iilonga oyindji. Reverend Isack Kandjone, ngoka gumwe gwomaakuluntu naaleli yomukunda moka, okwa ulike ekemo lye, neikwatopomutima lyil i mumwe noluhodhi omolwekanitho ndyoka ngashingeyi kaali li momake gawo.
“Elunduluko lyonkalo yombepo olyo unene tali tu etele uumbanda. Out li nale monkalo yoshikukuta, katu na iikulya oshoka inatu lokwa omvula ya za ko. Oonzo dhetu dhiikulya ndhoka hatu mono mokuti otadhi ende tadhi kana po nepangelo ndjoka hali tu pe iikulya yoshikukuta otali ende kashona. Paife oondjamba odho ndhoka tadhi teyagula po omikwa dhetu, otu na uumbanda kutya otashi vulika tu ka kanithe ashihe shoka tu na,” ta ti ngaaka.
Kandjone a fatulula: “Omiti ndhoka odha simana noonkondo kutse. Omo hatu mono otee, okaofi, iiyimayi, iihemba ndho ishewe odho hadhi tu pukulula mofuka ngele twa kana. Ashike ngele owa ende to tala tala mofuka oto mono kutya odhindji dhomudho odha yonwa po. Otashi uvitha nayi.
Sho aatoolinkundana yaNew Era ya hingi taya talatala mofuka oya mono shoka tashi popiwa kaakwashigwana. Lwopo 08h00, otwi itsu moondjamba dha kundukidha omukwa tadhi hoko pekota lyago. Odha tameke okuyuguna ko omapeta e tadhi hoko, tadhi longitha oonkondo, sigo dha thiki mpoka pu na omeya. Sho dha mana okunwa omeya momukwa ngoka odha yi ishewe komikwa ndhoka dha landula ko. Anuwa osho owala hadhi ningi ngawo sigo dha kumwa. Uupyakadhi owu li mpaka kutya ngele omukwa ogwa hokwa ngawo ekololo nena ohagu si. Okanano okashona okuza pomikwa ndhoka, opudhilwe dha ndhingililwa nomamanya. Anuwa elelakano oga kale eiyinda ndyoka lya tulwa po kaanambelewa yiiministeli womakuti. Ashike einda ndyoka kali na sho tali kwatha. Kandjone Ota pula andola pu fulwe oomboola dha gwedhwa po, dhi gandje omeya koondjamba opo kaadhi ehemeke we omiti.
Ta ti enota lyoondjamba itali ya etele owala uupyakadhi woku hanagula po iikulya, ashike naatalelipo mboka yali haye ya kehala ndjoka oku tala oondjamba nomikwa itaye ke ya ko we.
Kandjone okwa pula elongelokumwe pokati ketonatelwa hala moka yeli nuuministeli opo ya fule oomboola.
Oshiponga
Enota lyoondjamba inali nika owala oshiponga komikwa, ihe nokaantu wo. Manga New Era a li ta thigi po etonatelwahala ndyoka, okwi itsu momusamane gwomukokele ta matuka. Anuwa okwa thigi po ehauto lye e ta tanga omakwana ge a kuthe oonkali pepata. Konima yethimbo aatoolinkundana oya itsu mongundu yookahenge mboka ya li ya fufaeka. Mokati kaamboka taya vulu okuhokolola iihuna yoondjamba, omu na !Kaece Kaqece. Ita dhimbulukwa kutya oku na oomvula ngapi, oshoka oku na omukithi gokudhimbwa.
Ashike eholokepo lye otali ulike kutya okwa mona ooDesemba omilongo odhindji netokopya lyaAfrica ota vulu oku li popya. Ota dhimbuluka nawa esiko ndyoka a teka okugulu, hoka ngashingeyi ke mu etele uunkundi.
“Okwa li lwopo 05h00, sho nda waimine aakiintu ooyakwetu, tu ka nyange iikulya mokuti. Otwa li twa nyanyukwa noonkondo esiku ndyoka, tatu yolo tse tatu hapula… ohaluka otwa taalelathana oshipala noshipala noondjamba dha geya. Sho dha tameke oku tu tidha, ngame onda punduka,” ta popi newi tali kekama. Ta ti ka li we ta vulu okutondoka oshoka okugulu kwe okwa teka, ashike ondjamba mbele oye mu etele ohenda e tayi mu etha. Ta ti okuza mpoka okwa ka kambadhala andola a futwe kuuminiteli, ihe anuwa okwa lombwelwa kutya okwa kala unene ethimbo ele inaa lopota oshiponga shoka.
Ekandulepo lyomukundu
Nigel Swartbooi, omunambelewa metonatelwahala lyaNyae Nyae okwa ti omaipumomumwe pokati koondjamba naatu oga londa.
Ta ti oye shi shi kutya oondjamba otadhi yonagula po omikwa onkene epangelo pamwe netonatelwahala olya tula po oomboola, ndoka iilonga yadho yi li metifa, nayimwe oya tameka nale okugandja omeya.
Kombinga yoshikumungu shaKaqece Swartbooi okwa ti oye shi undulila kuuministeli.