ǀAEǁGAMS – Namibiab ǁGau!nâ-on ǀHûs (TUN) ge ra mî, ǂauna ǁgau!nâ-aon ǂgaoǀkhāsa ǁkhāǁkhāǂuisensa ūhâ tama tamas ka i o ǂâuǀoa hâse aiǂhomisa tama hâsa ǀasa ǁkhāǁkhā!khōǂgāb hîab ǂhanuba koro kurigu !kharu hâse ge sîsentsoatsoa kaiba ǁgau!nâs !aroma.
Nēs ge TUNs di sekretares xenerali Mahongoro Kavihuhab ra mîsa !oasa. Nausab ǁkhawa kō!gâsa ǁkhāǁkhā!khōǂgāba 2015 !nâ ge a sîsentsoatsoa-ūhe, xawes ǁgau!nâs !gûǁnâǀgauba ge aiǂhomisa tama hâ isa nē ǀasa ǀkharaǀkharasigu ǁkhāǁkhā!khōǂgāb diga sîsentsoatsoa kais !aroma.
“ǁKhāǁkhā!khōǂgāb ge ge ǀkharaǀkharahe, xawen ge ǁgau!nâ-aona a ǁkhā ǁgau!nâ-ao, hîa ǂâuǀoa hâ ǁkhāǁkhākhâis mâtin nē ǀasa ǁkhāǁkhā!khōǂgāba nî sîsenǂams tsîna māhe tamana.
ǂHanub ge ge ǁnā!gâ marisa ǂnûiǂuisa nē ǂhâǂhâsa !âba gowaǀîs !aroma,” tib ge Kavihuhaba ǂoago wekheb aib ge ūhâ i ǂhaitsi māǂui-i !nâ gere ǁgâiǂuisen.
“ǀAms ai nî hās ge ǀgôan ga ǂnû!gau tsî !kharu tama ǀgôan !gôaba a ǀgapi, os hoa ǀhawisa ǁgau!nâ-aon hîa ǁkhāǁkhāikhâisa nē ǀasa ǁkhāǁkhā!khōǂgāb !aroma māhe taman ai nî !naohesa,” tib ge ai!â ge mî.
Kavihuhab ge ǁkhāti ǀgapi !gôab di ǁkhāǁkhāǂuisa ǁgau!nâ-aon xawe a sîsenon, mâsib tsîna tsâǀkhā tsî ge mî, 2008 kuriba xun ǁaupexa 500 xa a !nāsa ǁkhāǁkhāǂuisa ǁgau!nâ-aona sîsenosib xa ra ǂhansenmasa. ǁÎb ge nē ǀgapi !gôab ǁkhāǁkhāǂuisa ǁgau!nâ-aon sîsenosib diba ǂkhawusa ǀaweǁguib ǁGau!nâ-aon !Oabadi Komites dis ai ra ǁgui, ǁîn ǁgau!nâ-aona sîsengu !aroma !gaes, ǀgapi !harodi !nâ ǂnûikhâis tsî !kharaga sîsen!khaigu ǁga sîǂuis ǀkha ǁgau!nâs sîsenǀgaub !nâ a dīxūxa amaga.
“!Gāsa a !khais ge Namibiab ǁGau!nâ-on ǀHûs mûǂgāba !oa, ministeris ǁgau!nâs dis tamas ka i o !hūb di ǀgapi ǁgau!nâ!khaigu ǂhâbasa ôa!nâde dī tamasa ǂhâsib ǁgâu!nâ-aon dib mâpa ǁgoesa,” tib ge Kavihuhaba ge mî.
TUNs ge ra ǂgaoǀkhā, îs ǀoasa ôa!nâsa nē ra sao disi kurigu !nân mâtikō ǁgau!nâ-aona mâ !harigu ai tsî mâ ǁkhāǁkhā!âgu !aroma nî ǂhâbasa !khais ǂnamipe dīhe, !gōsase nē ǀasa ǁkhāǁkhā!khōǂgāb ai ǂâisa ra ǂnûise.