ONGWEDIVA – Omupresidente Hage Geingob oshivike eshi okwa yakula nokutambula ko eembaapila domaindilo kovakalelipo voilongo omuwoi ve ya okukalela po oilongo yavo moNamibia.
Omukanda wa pitifwa kuhamushanga woikundaneki keumboi lepangelo Alfred Hengari otau ti ovo va ninga omaindilo kupresidente ove shi ninga shi li momaufoveta ekotamhango ngaashi shi li mokatendo 32 omo tamu popi kutya omupresidende woshilongo oye e na oufemba wokuyandja epitiko nokutambula ovanadipolomate ovo tave uya moshilongo.
MEtivali Geingob okwa yakula omaindilo e li ane a dja kwaavo va ulikwa koilongo yaavo opo ve uye va ninge eeambasada moNamibia. Oonakuninga omaindilo ovo Ethel Davis waLiberia, Komate Kamalanavin waThailand, Sagour Youssouf Mahamat Itno, a dja koRepublic of Chad naAstrid Emilie Helle wokoNorway.
Ava ova landula kwaavo vane va li va ninga omaindindilo mEtitatu loshivike eshi omupresidende okwa yakula omaindilo a dja keeambasada Presidende doilongo mwa kwatelwa Omar Ernesto Berroteran Paredes wokoBolivarian Republic of Venezuela, Sidenio Acosta Aday waCuba, Benjamin Kipkirui Langat waKenya, Jose Augusto Silveira waBrazil, naAngeUa V. Comfort waJamaica.
Eshi e va tambula Geingob okwa halela omitwe domatumo oukaleliposhilongo edi elao meenghendabala dokukoleka elongelokumwe povati koilongo yavo naNamibia.