Presidente ogu ana kukazamo ngesi kwedi oko, Ndokotora Hage G. Geingob kadivisire madina govantu ava vana kukalipakerera komazwi aga gagwana SWAPO, mosiruwo somahoroworo. Vamwe kayivamonekerere asi kapisi sitetu ntani kapisi yipe morwa vantu vamwe yimo ngorooro vayigazara. Simwe sosipe sapira simpe kukarapo kuna kara nye kansela ndi egendeso lyoupresidente omu muna hamene Presidente gwanare, ndokotora Sam Nujoma, ntani Presidente nye ogu ana kukatundamo ngesi Hifikepunye Pohamba, omu ngava kara asi yiwo vana kugava magano kwaPresidente ndokotora Hage Geingob, Vatumburwa vendi ava kapi vana kara asi kupi vana kukarugana, nye mwene ndi kuvura muntu ovatare nare onodiva asi yinke vana wiziremo. Ndokotora Haufiku, ogo nare yina moneka asi takakara goruha roministeli zouhaku, ano ogu Kandjoze koruha ronomina. Mubisofi Kameeta, nare gadivikwa omu gakondjesa pakare ministeli zina kufira sinka woruhepa. Awo kunakara mokulikwama ngesi.
Pendukeni Iivula –Ithana
Jerry Ekandjo
Katrina Hanse –Himarwa
Zephania Kameeta
Albert Kawana
Dr. Bernhard Haufiku
Obed Kandjoze
Heather Sibungo
Age katente asi vantu ava kuna tara asi yinke ndi asi ngapi omu nakavaruganesa ntani yinke eyi vadiva pwavene. Ano vamwe nye ava twadiva nare kuna kara asi nampo kuvhura vavape mavango googo vana kara nago ndi navatjindja. Ano ava nye wokugava magano kwaPresidente, awo kuna kara asi kuvhura valigwedere mokukazigidako vamwe vakere nare momapundi gokuzeruka mepangero. Vamwe kuna kara nye nonomutjima dina pilire kuwapa morwa kapisi yimo kavayindindilire. Nye kapi ayikara asi moomu ono kugazara yimo nayihoroka. Ogu ana yirugana nage ana kara nokonda asi yinke ana kuruganena yikare ngoso. Vamwe kuna kukaretapo asi kapi ana ruganesa elikwamo lyaSWAPO lyokutanta asi mugara nomukadi madina ndi sivaro sihatekane. Age kalimbwilre kepuro olyo asi olyo elikwamo lyombunga zendi zaSWAPO, kapisi kepangero. Epangero simpe kuna kara asi wahepa kupa vantu sirugana kukwama omu ono kugazara asi tavakarugana. Nage yimo nye ana kuyimona asi vantu ava katulire kapi yina kara tupu asi kapi ana gazara hawe. Ntani age kagwedereko asi movantu nye wombunga zaSWAPO, vana kuza kombongarero zanavenye zompe, age kwavapura vagave asi ngapi lyakara udivi wawo nelirongo lyawo yipo asi apa nakavapa sirugana souministera ndi munona gwaMinistera age ana diva asi muntu ogu yinke tuna kundindira kwendi. Kapi ana hara kutura tupu muntu ogu ana kara asi oro ruha vana mupe kapi vana diva asi yinke nakarugana ntani yinke gadivako. Egano eli vana kumona vantu asi talikavatera momunene.Ntani age katente asi omu ava tara kutara upolitika womuntu ntani tavatara asi nomukunda detu sili vana dikarerepo ndi hawe, Nsene vana mana nye kutara oyo ntani nye navadiva asi vantu ava ngapi omu navavapa sirugana vakaruganene muhoko.
Age kapere vantu mukumo asi vahatjira tavakaruganena vaNamibia navenye kapi yina kutanta asi ruha rumwe tupu. Age Presidente gosirongo govantu navenye kapisi asi nampo ruha rumwe ndi asi tatara vamwe tupu. Vanambudi vetu vamwe kavatente asi omu ana kuuyunga hawe ngwendi nare yige Presidente morwa kuna kuuyunga nomukumo. Yimo yawapera kapisi ove ono yidiva asi tokakara Presidente simpe kuuyunga nowoma. Nokutanta mwene asi ame neyi twazire momahoroworo nayidivire asi ame Presidente kapisi kandindate. Vakwetu yiwo vakere vakandindate ame kwakere Presidente. Morwa simpe kapi vana ganesange yiyo muna kutumbura asi Presidente ogu vahorowora. Nye mwahatjira gumudame tatukaruganena sirongo kumwe nombunga zange ezi zatunda kombunga zetu zaSWAPO. Age kaperepo asi narumwesi kapi ngakapa wonombunga peke asi vakakare mokabinete. Owo vakare morwa awo kuvatumbura asi varwanesi omu novareta vaya kurwanese monda ngapi vakare kooko konze varwanene konze. Kumwe nokugwedako mokupandura vaNamibia, unene wombunga zendi vamuhorowora morwa neyi ana kukaruga hawe kuna kukatura Manifesto zaSWAPO moyirugana. Nombudi kuna kara asi pelikwamo lyomadina gombunga zaSWAPO, poveli vamwe vana kara asi kwarugana umbondo ngapi omu muna kuvarugana, age katente asi wokurugana umbondo vahepa kuyidiva asi kapi vana vapulisire morwa umbondo melikwamo lyaSWAPO, kapi vayipulisira yipo asi vantu vahepa kuyidiva asi nsene warugana epuko ove ngoso kapi nokarapo hena pelikwamo. Owo vana kara momukaro gwangoso hawe vadive asi awo tuna vagusapo. Ntudi veta kapi zina vagwana epuko. Nsene asi veta kuna vagwana epuko vadivare kukara pelikwamo eli tuna kara nalyo ngesi. Age simpe kalimbwilire kepuro asi kweli musirumbu gumwe gayadipagere vaNamibia siruwo soukonoloni asi ana hara kuwiza ayatunge moNamibia, koKavango. Age katente asi ogo ntudi kuna hara kuyafa vantu navayamudipaga narumwesi awizemo omu. Nye kuna kumoneka asi mouhunga ana kara morwa muntu ogo eyi vana kumutjidira mwawo morwa kwadipaga vantu moomu tupu gayarugana moNamibia. Yipo asi nose kapi tuna hara vantu wokudipaga vakwawo asi nyose natuyatunga nawo. Vantu womoNamibia gumudame ose tuna liwapayikire mokurugana magano nare pogeli mwahatjira. Yimo ana kuhulisa ngoso Ndokotora Hage G. Geingob, ogu tuna kundindira aka guse upresidente kwaHifikepunye Pohamba.