Omupresidente wongudu yoPopular Democratic Movement (PDM) McHenry Venaani okwa tanga Omupresidente Hage Geingob ta ti okwa li a talika ko ongaxe yoshiwana molwaashi kakwa li e na oukwamuhoko.
Okwa ti unene tuu ngeenge Geingob e li momitumba novaleli va yooloka okwa kala alushe ha popi nombili, nomutima u na ehafo a tala ko ovanhu ongofamili yaye.
Edi Venaani okwe di popya mexuliloshivike koshivilodimbuluko shaGeingob kokapale koIndependence Stadium. Geingob okwa xulifa momafiku 4 Febuluali koshipangelo shopaumwene shoLady Pohamba konima eshi a monika okaanghela. Venaani oo a li umwe womovahumbati voshikefa shOmupresidente Geingob, okwa ti okwe lihonga shihapu pefimbo kwa li ta longele pamwe naGeingob moshikondo shounapolitika unene tuu pefimbo ngeenge ve li moshiongi naye. “Onda kanifa mbushe wange moilonga. Omulumenhu kwa li e na olukeno noshiwana shaNamibia shaashi okwa kala alushe ta lalakanene onghalonawa yOmunamibia keshe,” ta ti.
Onghee okwa ti Geingob okwa fiya po omwaka wakula pehe na tuu nande omunhu ta dulu okufitika.
“Ohatu li li Omupresidente wetu, omulumenhu kwa li e hole ovanhu nokwa li a tala ko Ovanamibia aveshe vefike pamwe. Geingob okwa kala alushe ha ti kape na Omunamibia ta fiwa konima ngeenge otashi ya keliko loshilongo,” ta ti.
Venaani okwa ti pefimbo lombuto yoCovid-19 ya monika moshilongo Geingob okwa li e na oshisho noshiwana molwaashi okwa li a ninga omitumba neeminista da yooloka noshoyo okutula po omilandu dokukelela ombuto.
“Vahapu otava ka djuulukwa ondaka yaGeingob ngeenge ta ningi omutumba wokuyandja ouyelele kombinga yombuto yoCovid-19 shaashi okwa li ha popi newi la ndjanga, yee ta yolo,” ta ti.
Okwa hokolola ta ti oshiwana itashi pu okulila epandafule, Omupresidente omutitatu waNamibia, omuleli woshili noshoyo omulumenhu kwa li ha longo noudiinini moshilonga shaye.
Venaani okwa longifa yoo omhito oyo okukumaida oshiwana opo shi kale nombili, oukumwe pehe na oukwamuhoko molwaashi Omupresidente Geingob kakwa li e hole oukwamuhoko.