Festus Hamalwa
Omupresidende Dr Hage Geingob okwa popya ta ti ovakwaita vetanga leameno nava kale tava longo nelitumo nonande ouministeli wa talela omashongo a yooloka.
Geingob edi okwe dipopya Etine pefimbo kwa li a taalela po ovakwaita vetanga leameo kuUulunga Wakolondo oku kwa ninga omafiku kuna ovakwaita vetanga leameno tava pewa omadeulo kombinga yoilonga yavo nonghee vena okulongifa oilongifo yovakwaita.
Okwa popya ta ti okwa pandula unene ovakwaita aveshe va kufa ombinga momadeulo.
Geingob okwa ti Namibia okwa pumbwa oshilongo shina ovakwaita vadeulikika lela opo va dule okukala tava longo moshili pefimbo ngeenge tava kala moita.
“Omadeulo aa okwa fimana shaashi okwa yandja omaunongo ahapu kombinga nghee ovakwaita tava kala tava longo neendjebo ile noilongifo ikwao ya yooloka hai dulu okulongifwa komukwaita ngeenge ta kalwa ile mokutula po eameno,” Geingob ta ti.
Okwa ti ovakwaita vetanga leameno otave shi endifa nawa moilonga yavo ngeenge tava longo nondjungu nokukala vena elitulemo la wana ngeenge tava pewa omadeulo oludi latya ngaha.
“Ouministeli weameno nau twikile okukala tau yandje omadeulo kovakwaita moshilongo ashishe opo Namibia a kale e na ovakwaita vapyokoko efimbo keshe okukala va kalwa ngeenge pa holokasha,” Geingob ta ti.
Omutwe woshilongo okwa ti okwa pandula unene ovakwaita vetanga leameno eshi va kala nokuamena oshiwana efimbo keshe nokukala tava kondjifa okulwifa oimbuluma, osho yo okukaleka po eameno moshiwana.
“Ovakwaita ova kala nokulonga oshilonga sha fimana pefimbo lombuto yoCovid-19 ya kala tai dana onghadangala moshilongo, omo ovakwaita va kale tava tula longo oufiku nomutenya okutula po elandulafano neemhango opo oshiwana shiliufe komilandu doCovid-19,” Geingo ta ti. – fhamalwa@nepc.com.na
