WINDHOEK – Ya atumezi kunga bueteleli bwa naha, Hage Geingob Maabani u tumusize sikwata sesinca sa muuso kungelela cwalo ni makolo a manca ni mabizo a limembala za Kashandi kaka ncha kakatasebeza mwa kamaiso ya hae.
Biki yefelile na tumusize Dr Nickey Iyambo kuba yena mubakweli wa mueteleli wa naha, Saara Kuugongelwa-Amadila kuba Ngambela yo muncha ni Netumbo Nandi-Ndaitwah kuba mubakweli wa Ngambela wa naha. Nandi Ndaitwa hape u ta etelela Likolo la Litaba za Kwande ni Swalisano. Makolo amamwi a bupilwe ni afilwe mabizo a manca ki la Ministry of State Owned Enterprises, Likolo lelibona za kufelisa bunjebwe (Ministry of Poverty Alleviation), Ministry of Education, Arts and Culture, Ministry of Higher Education, Training and Innovation, Ministry of Industrialization, Trade and SME Development, Ministry of Labour, Industrial Relations and Job Creation, Ministry of Land Reform ni Ministry of Sport, National Services and Youth.
Likolo lelibona za Lindwalume likutiselizwe fafasi kakuba mutai wa Lindwalume feela.
Mutai wa Lindwalume u ta etelelwa ki likwambuyu yomunyinyani ya ta zwelela mwa Ofisi ya mueteleli wa naha. Tom Alweendo u taba likwambuyu ya etelela National Planning kuzwelela mwa Ofisi ya mueteleli wa naha. Hape u tumusize kuli situlo sa Muelezi wa mulao kwa muuso (Attorney General) nesikopani ni sa Ministry of Presidential Affairs, kanako ya cwale sitabe sikemezi sinosi kukona kufitisa likelezo za mulao kabubebe. Hana lika kutalusa likalulo za bao babupa kamaiso, Geingob u ize Iyambo u kaba muelezi wa hae, wa likunutu za litaba za naha kacwalo u tabanga ni mikopano ya putako ye tokwa kelezo kuzwelela ku mueteleli wa naha. Ngambela wa naha u ta zamaisa likalulo za misebezi ya ndu ya milao.
Muǹoli wa Kashandi yo mwanako ya cwale a sika tumuswa kale, u ta ipihanga ku Kuugongelwa- Amadila. Kuamana ni Nandi-Ndaitwah mwa situlo sa hae sa mubakweli ku Ngambela wa naha, Geingob u talusize kuli u ta etelela likolo lelibona za Kwande ni Swalisano kukona kupaheka Namibia fa mapa ya lifasi. Geingob u ize mayemo a muuso omunca a bonahala kutula kwa mali kono u sepisize sichaba kuli kutula kokuzamaelela ni mayemo a manca a ta nyinyifazwa.
“Puso ya tato ya sichaba, kamaiso ni lisebelezo zende litokwa sikwata sa kamaiso sakata ni tutengo totubupilwe ka teko yetula. Ki nto ye zibahala kuli kupeta milelo kaputako, kukona kuhulisa sifumu sa naha kabubebe, kutisa misebezi ni miselo ye minde, kwa toloka mueteleli wa naha. Geingob maabani nasika tumusa kale mabizo kaufela a makwambuyu babanyinyani sina litulo kaufela anelisika tazelezwa kale. Na sika lika kuama fa taba ya membela yata okamela sipula sa muelezi wa mulao kwa muuso (Attorney General) seo nesisweli ki Dr Albert Kawana ya ketezwi kuetelela Likolo la Justice. “Kashandi kao ka zamaiswa ki mueteleli wa naha, u tatambeka misebezi yemimwi ku mubakweli wa hae kamo itaba Cabinet ye tezi. “Mikopano i ta mbweshafazwa kakumema bo chaziba kuzwelela tutengo twa kwa mukunda ni twa sichaba kuikambota litaba za mayemo a pahami,”kwa talusa Geingob.
U ize, mulelo ki kukopanya misebezi ya Kashandi, kukonisa mueteleli wa naha ku zamaisa Kashandi sakata kakana ni litaba zehatisizwe zeo lilitezi tatululo.