Konima yefumbiko lyomupresidente Hage Geingob mOsoondaha, Epangelo lyaCuba olya gandja ombandi ya simana yedhina “Jose Marti” komuselekadhi, Monica Geingos.
Omupresident gwendiki tali ithanwa National Assembly of People’s Power, Esteban Lazo Hernandz, ngoka kwa li e lile komeho osheendo oshinene shepangelo lyaCuba, okwa gandja ombandi ndjoka kuGeingos nokufatulula shoka tayi ti.
‘’Ombandi ndjika oya lukilwa gumwe gomomapandafule ngoka a li a kondjele oshilongo shetu nokwa simana moshilongo shaCuba,’’ ta fatulula ngaaka. Ta ti, ombandi ndjoka oya li ya pewa omupresidente Geingob omumvo gwa yi momasiku 26 Aguste, nonando kakwa li e yi thikithilwa. Omusimanekwa gumwe a li pamwe nolweendo ndoka esiku ndyoka, Christine //Hoebes okwa popi ta ti, you uvu nawa sho Namibia a taamba ombandi ndjoka, nonando ngoka e yi nuninwa ke ko we. “Ombandi ndjika otayi ulike iilonga yomupresidente Geingob, ombili oshowo uuyuki a kala nawo sho a kala ta lele,” ta popi ngaaka.
Ta ti, Geingob okwa kala nokulonga nuudhiginini nokukwashilipaleka ekwatathano ewanawa pokati kiilongo ya yooloka oshowo okukaleka po ombili. Ta gwdha po ta ti, omolwaayihe mbyoka omupresidente Geingob ote shi pandulilwa nokusimanekwa.
“Otatu pandula ayihe a longele oshigwana,’’ ta pandula ngaaka.
Oya popi wo kutya Geingob Omunamibia omutiyali ta mono ombandi ndjoka okuza kepangelo lyaCuba, konima ya li ya pewa tango Omupresidente Sam Nujoma. Esiku olyo tuu ndyoka omupresidente Nangolo Mbumba okwa li a kuutumba niiyendo ya za kiilongo ya yooloka ngaashi Egypt, Cuba, Spain, Portugal, Uganda, South Korea oshowo China, okukoleka uukumwe nombili pokati kiilongo mbyoka naNamibia. –vkaapanda@nepc.com.na