Omunyekadhi nale gwoshilongo Monica Geingos okwa ti ota ka mana iinima mbyoka a ali a thigi poshitaafula she oomwedhi ndatu shi a yi koosa dhomusamane gwe nakusa omupresidente Hage Geingob.
Geingob okwa hulitha momasiku 04 Febuluali 2024.
Geingos momushangwa oo a pititha mOlyomakaya okwa totha mo iinyangadhalwa yoOne Economy Foundation, ekuthombinga lyaakiintu mopolitika, omahepekathano guukashike ko okantuu a kwatela mo nogopamilalo noshowo uundjolowele wopailyo
yoluvalo.
“Onga gumwe gwomwaamboka ya kanitha aapopepi yayo, itandi ka tala ashike kuukolele wuundjolole wiilyo-valithi yoomeme, ashike paife otandi ka kwatele mo okaankera kehe,” Geingos ta ti.
Ta ti oku kanitha omuholike gwe oshinima oshidhigu noonkondo, na unene oku mu kanitha molwa okaankela yokelambalamba oshinima tashi ehameke omwenyo noonkonkondo, no itashi vulu oku dhiladhilwa.
Geingos okwa pandula Aanamibia sho ye mu ulukile ohole pamwe nofamili ye pethimbo loku lila omupresidente Geingob. Ta ti Geingob okwa li e na uukwatya wi ikalekelwa nomoku kala kwe okwali a gumu oonkalamwenyo dhaantu oyendji.
Omuselekadhi waGeingob ta ti omatumwalaka gomahekeleko oku za koombinga noombinga dhuuyuni ogo endhindhiliko kutya okukala kwomusamane gwe naantu okwali okatengelelo koshili konkalamwenyo ye sho a kala omugandji.
“Kandi na iitya oku mu pandula amuhe omolwa oongala, omagano, omupendu, omatumwalaka, omagalikano, uukwawowanankali nohole ndjoka mwa ulike. Osha yela kutya ekanitho ndika olya li ekanitho lyetweni atuheni, noku lila Hage kashi li oluhodhi lwomuntu gumwe,” ta gwedha po.
Geingos ta ti osha simana oku dhimbulukwa aluhe Geingob muukwatya moka a li – ngaashi a li e shi hole – nopaife oshinakugwanitwa shAanamibia oku landula oshiholelwa she noku ya komeho nonando Geingo ke po we. -Nampa