BWABWATA – Likwambuyu yabona zasifumu nikutwano yazwelopili mwanaha Germany Gert Muller, nazibahalize viki yefelile kuli, neulo yelikana bolule ba N$167 ifilwe kutusa kulwanisa linanga mwasikiliti sa Kavango ya Upa. Nabulezi manzwi awo kanako yakukwalulwa simubuso kwa liofesi zenca zasibaka sapabalelo yalifolofolo sa Bwabwata. Miyaho yeminca hala zeñwi kuna nimalobalo ababeleki mi neyahilwe kakuba neulo yanaha Germany. Lipiho libonisa kuli linanga litaselize hahulu sikiliti mi bucwañi habusafumaneha. Tala niyona itaselize sicaba sihulu babaitinga fakulima lico kungelela cwalo ni Makwengo.
“Sibaka sapabalelo yalifolofolo sa Bwabwata sihapa bapoti babañata, mi naha Germany inze isebeza katata ni naha Namibia kuyaha miyaho, kutisa lisebeliso, nikuhulisa lisebelezo zasibaka sapabalelo yalifolofolo, kono kachenu nizibahaza kekezo yabolule ba N$167 kutusa sikiliti bakeñisa matata alinanga mwakutusa sicaba ni balimi,” nekubulezi Muller.
“Lukafa tuso kwabatu babapila mwasilalanda se kakuli hakubunolo kupila nikubelekela kwanu,” naekelize. Nabulezi hape kuli lifasi likona kuituta kwanaha Namibia hala libaka zesilelelizwe, mi naekelize kuli naha kimutala kamo limbule zasilelezwa, takazo yasifumu nikuba nikabelo likona kuzamaelela. “Lukona feela kueza musebezi waluna bakeñisa musebezituna omusweli kueza kwanu mi hakubunolo, kikusebeza katata kwamina mi kacwalo nibata kuitumela kuwena likwambuyu wa silalanda ni bupoti, Pohamba Shifeta, ni belubeleka nibona babali kwanu ba GIZ, Kfw nimina kaufela babali kwanu. Nilakaza kuli miyaho yeminca yekazibahala kamiyaho ya Nali ibe nibukamuso bobunde, Germany inzi ni mina cwale nikwapili,” nabulezi.