Lüderitz – Omukwateli komesho woLüderitz Nest Hotel Ulf Grünewald okwa shakeneka epangelo ondjilakati eshi a yandja omaano okambete koulola opo ovanambelewa vopolifi moLüderitz va dule okunangala koshi yotuwa ngeenge tava tale oindjina yotuwa ngeenge eetuwa tadi etwa popolifi nokukonaakonwa.
Sargent Rauna Haindongo, ha longo koshishikondo shokukonaakona eetuwa mopolifi yaLüderitz okwa pandula o Lüderitz Nest Hotel, eshi ya yandja omaano koshikondo oko ha longele.
Haindongo okwa kufila ko Kundana nghene sha enda opo omunangeshefa Grünewald a dule okuyandja ekwafo loludi eli koshikondo shokukonaakona oyeendifo mopolifi moLüderitz. Ota ti efiku limwe Grünewald okwa li a eta otuwa yavo yoilonga opo i konaakonwe komunambelewa koshikondo shopolifi osho shi na oshinakuwanifwa eshi. Sargent Haindongo, oye a hangika e li moilonga efiku olo. Nomunangeshefa okwa li a tala nghene omunambelewa ta i koshi yotuwa oko inaku yalwa nande osha.
Okwa tumbula kutya omunangeshefa okwa udaneka ta ka landela oshikondo eshi okambete oko haka dulu okuya koshi yotuwa, nomunambelewa, oko nee ta dulu okunangala nokutala otuwa koshi.
“Nena osho a ninga otwa pandula shili, shaashi okwa pupaleka oilonga yetu. Paife ohatu kala ashike hatu tula okambete aka koshi yotuwa, opo tu dule okunangala ko ngee hatu longo oilonga yetu. Otwa pandula unene, ngeno ovanangeshefa vakwao nava kufe ko oshiholelwa eshi shiwa shokuyambindida epangelo apa tashi pumbiwa.” Haindongo osho a tumbula.