Victoria Kaapanda
Omuntu gumwe okwa hulitha, omanga yane ya mono iiponga sho oohauto moka yali dhi indhenge mumwe, omutse nomutse.
Omugandji gwomauyelele gopolisi moshitopolwa shaHangwena Sergeant Andreas Nghiyolwa okwa ti, oshiningwanima shoka osha holoka lwopotundi 02h00 oku pendukila Etitatu, mondjila yopokati kEngela nOmafo moshitopolwa shaHangwena.
Otaku hokololwa kutya ohauto yoToyota Vvti yoshikoto, nokatuukala koToyota Corolla oya li yiindhenge mumwe omutse nomutse, naantu mboka yali moohauto ndhoka okwa li ya mono iiponga.
Nghiyolwa ta ti, mohauto yoToyota Corolla omwali aantu yatatu mboka kwali ya ka mona uuhaku koshipangelo kEngela.
Ta ti, ohauto yoToyota Vvti yoshikoto okwali yina aantu yaali mwakwatelwa omuhingi gwomimvo 43 ngoka kwali a hulithile poshiponga omanga omufaalelwa kwali a ka mona uuhaku. Pethimbo oshifo shika kwali tashi ka nyanyangidhwa, opolisi ka kwali yina uyelele kutya oshiponga shoka okwali sha holoka ngiini. Mehuulilo shiwike oshiponga shohauto osha faalele omwenyo gomukiintu gomimvo ndhopokati moshitopolwa shaHangwena.
Otaku hokololwa kutya ohauto ndyoka kwali tayi hingwa komukiintu ngoka, okwali yiindhenge nohauto yimwe omutse nomutse.
Nonando kwali afalwa koshipangelo meendelelo okwa ka hulitha konima yomasiku gaali. Opolisi onkene tayi tsikile okukumagidha oshigwana shi hulithepo oku hingilila.
Tayi ti, iiponga tayi faalele oomwenyo dhaantu ohayi etwa koku hingilila, oshoka ohauto oyili mondapo. Ya fatulula kutya uuna ohauto itaayi hingilile, ihe oshiponga tashi holoka, aantu ihaya mono iiponga oshoka omuhingi okwa vula okupangela ohauto.
Ehangano lyinasha noondjila omwendhi gwayi olya lopota aantu ye vulithe puyahetatu ya si, omanga ye li 117 ya mono iiponga momakandomo goohauto geli 67, mbyoka ya ningwa muule womasiku gayeheyali.
Lya kumagidha kutya uuna oshiponga sha holoka mondjiila dhenga konomola yopolisi 10111 nenge MVA 0819682.
– vkaapanda@nepc.com.na.