Taimi Haihambo
ONGWEDIVA – Lulu Gugushe, omukalimo waWindhoek okwa ti keshe odula oha kala e linekelelwa oshinakuwanifa shokueta omajumping castel, omo hamu kala ounona tava nhuka keshe momauliko oipindi aNgwediva.
Gugushe vati konima eshi a pendjelwa moilonga yaye youhongifikola, ponhele a shune koSouth Africa oku a dile shaashi ye odalele yaSouth Africa nonande e na oufemba waNamibia paife, okwa waimina mongeshefa yomalihafifo ounona oo ashivika nawa nedina “Jumping Castels”.
Ongeshefa vati oya kala tai mu endele nawa neenghono, osho sha etifa nokuli a kale e linekelwa oshinakuwanifa shokueta omalihafifo popepi nounona keshe odula.
“Omauliko ahapu opaipindi aa haa ningwa moNamibia ngeenge tashi ya poshikodo shomalififo ounona aame ashike handi linekelelwa po,” ta ti.
Okwa ti ongeshefa ei okwe i waimina mo 2020, noha dulu okudimbuka noN$100 000, pexulilo lomauliko oipindi ahapu. Okwa lombwela ovanashilonga vahapu tava i moipundi yetulumuko kutya omungome wavo ou hava pendjelwa nao, hao ashike nau kale tau vakwafa. Okwa ti nava kale yo ve u topolela moinima tai va etele sha ngaashi eengeshefa nosho tuu.
“Eshi ohandi shi popi shaashi omungome wopendjela ohau longifwa ashike tau pu po ndele itapu ya sha. Onghee okwa hala ovanhu ava tava pendjelwa va kale va pashuka nawa, ngeenge tashi ya pokulongifa oimaliwa yavo yopendjela,” ta ti.
Okwa ti ongeshefa yaye natango oi li po okupashula ounona, noku va ulikila omaudano opashinanena, shaashi vati nande okanona oke ke lihange ke li kondje yoilongo, oke shi shi ngaho kutya kounyuni oku na oshinima hashi ufanwa jumping castel nosha fa peni.
Gugushe okwa li omukufimbinga momauliko opaipindi natango neudo mOngwediva.