Omukainhu weedula 35 okwa hokolola ta ti oha xupu ashike mokulandifa eendooxa odo a kala ta toola modoolopa yEenhana peenhele deendingosho.
Helvy Ndamonako omukalimo womodoolopa yEenhana okwa ti oku na ounona vane hava i kofikola aveshe noku li he va yambidida noshimaliwa hashi di meendooxa ngeenge a landifa.
Okwa ti paife okwa landifa eendooxa oule weedula mbali a tameka konima eshi a kanifa oilonga yaye sha etwa kombuto yoCovid-19 oyo ya shunifa oyuuyemo pedu.
Ndamonako okwa eshi ofikola ya tameka oda hangika nda landifa oshimaliwa N$500 osho nda longifa okulandela ounona vange oikwafifo yofikola nokulandela mo okaana kange koshiveli omudjalofikola ke li mondodo onhi-8.
Okwa yelifa ta ti xe younona vaye naye iha longo onghee eshi osha eta opo a kale ta nyangadala mokulandifa eendoxa opo a dule okulimonena okamaliwa komondjato.
“Ondina omukomo wokukala handi longo nondjungu shaashi eendoxa dange adishe ohadi pupo diva, no nande kashipu okukala a ndeendenda nodoolopa aishe handi kongo eendoxa,” ta ti.
Ndamonako okwa weda po ta ti ongeshefa yokulandifa eendoxa oya lundulula onghalamwenyo yaye eshi paife ha dulu nokukala ta lande oipumbiwa yomeumbo noshoyo oikulya younona yokofilo mokufafanifa nonghalo omu a li tete eshi ehe na ta ningi.
“Elalakano okulwifa ondjala noluhepo. Okukala meumbo kakuna eshi ta ku penge onghee ondina okunyangadala fiyo handi mono oilonga,” ta ti.
fhamalwa@nepc.com.na