Rundu- mukurona govaporosi gwanare moKavango zoupumezuva Johanna Ngondo moutano una puko kakageve nye mberewa ntani noyiruganeso yakara asi yiyo aruganesa mukurona pomberewa zomukunda eyi kageve komukwamimo gwendi Andreas Haingura. Haingura pwanare kwakere asi mukurona gomukunda gwaOmaheke. Apa nye kagwene nonkondo doyiruganeso, age katumbwidilire kukarugana novahamenimo navenye yipo vakagusepo ukorokotji momukunda. Ngondo kavamurundwilire vamutware komberewa zonene zovaporosi moVenduka, omu nye nakaka kara momberewa zonene zantoni govaporosi Joseph Shikongo.
‘’ Apa nye ninakugusa sinka sangesi, ngakomanda gomukunda, ame nina tambura sirugana esi paefumadeko ntani pwanyamwange asi nanirugana moomu navhulira moomu ana penge sirugana esi ntoni govaporosi, (Shikongo) omu nanigendesa mukunda ogu gwaKavango zoupumezuva. Apa nye nina kuza mosirugana sangesi, ame nina diva udigu ou tuna kara nawo, ngesi mwange una kara udigu naunye ou. Yimo ana kutanta Haingura. Mukurona govaporosi momukunda kuna kutanta asi age ana parapo asi vahepa kuruganena kumwe novatungimo yipo sirugana sawo sika sike mouta wakora.
‘’Ame kuna sikama apa nokutanta asi nomukamona vaporosi mwankenye evango, momukunda ogu, omu nye navakalituramo asi pwahakara maudigu nkenye gounamahaka,udigu twahepa kuugusapo momukunda ogu. Nzodi zange zokurugana mouporosi kuna kukazigusa mokutwaramo omu vayinduruka megano twaromo lyombapira zaIG, omu navarugana vaporosi. Yimo ana kutanta. Age kagwedereko asi; ‘’ Ose natukatulisapo malikwamo gokugwanekere kumwe novantu nkenye apa tulipe nombudi moyigongi makura tugwana asi nkarapamwe azo ngapi zina kuyimona nokutara asi vene ava vakorokotji kuvarugana ngapi yipo tutunde moudigu wangesi. Komisare gomupe simpe katente asi vaporosi megendeso lyendi kuna kukahundira asi nkarapamwe zirugane kumwe nawo yipo asi vasikisemo situmbukira sawo, yina kara asi kusikisamo veta ntani kukeverera mpora. ‘’ Yina kara mulyo asi vaporosi, nonkarapamwe varuganene kumwe mokurwanesa ukorokotji. Morwa vaporosi kapi ava kara asi nkenye siruwo kuvhura kuvagwana kwankenye evango. –jmuyamba@nepc.com.na