Auleria Wakudumo
Omupresidente Nangolo Mbumba okwa pula omalelo opamifyuululwakalo a kwashilipaleke kutya kape na omukwashiwana ta fi kondjala moitunda yavo. Mbumba edi okwe di popya eshi a patulula omutumba womalelo opamifyuululwakalo onghela moWindhoek.
Omupresidente ta ti ina hala okuuda ovakwashiwana tava fi ondjala omanga pe na oikulya moshilongo tai dulu okupewa ovakwashiwana.
“Natu lilongeni okutukulilafana oikulya. Ohandi pula omalelo opamufyuululwakalo, ookansela, nakeshe umwe mwa kwatelwa ombelewa yomupilima nombelewa yomupresidente tu longeleni kumwe opo tu finde omafyo ondjala noluhepo moshiwana,” Mbumba ta ti.
Mbumba okwa ti okukondjifa oshikukuta okwa pumbwa elongelokumwe okudja keembinga adishe, keshe umwe a tule kumwe oukuni ku findwe oudjuu ou.
Mbumba okwa ti okwa mona omaindilo mahapu a dja komalelo opamifyuululwakalo taa pula oyeendifo ashike omupresidente okwa ti omaindilo itaa dulu okutulwa moilonga manga shaashi ope na eemhumbwe dimwe ngaashi oshikukuta, ondjala noluhepo moshiwana. Mbumba okwa kunghilila omalelelo a tule oinima ya kuma oshilongo ashishe komesho tete.
“Onde lineekela ohatu ka longela kumwe nomalelo aeshe opamifyuululwakalo okuyambidida oipambele imwe ya wedwa po yoshilongo ngaashi okukwatela po oveta nelandulafano, okufinda omahepeko akwalukeshe oshoyo omahepeko ounona nokatongo koukwamuhoko.
Nande ongaho, Mbumba okwa pandula omalelo opamifyuululwakalo eshi taa twikile okuyandja omakwafo mokulwifa oluhepo nondjala moshiwana.
“Okukwafela kweni otaku twikile okuyandja oshiholelwa kovaleli vopamufyuululwakalo ta eya ovo natango tava teelelwa a ka kandule po omaupyakadi a faafana moshiwana taa twikile okumonifa ovakwashiwana unene tuu ava havadi koushayi oixuna,” Mbumba ta ti.