Omukainhu weedula 45 ota kongwa ehe wetike, eshi a faduka po konima yo nghendabala yoku xwikila ounona vaye vane monduda.
Paife omukwainhu ou okwa ninga oivike ivali a kana.
Otaku hokololwa omukainhu ou vati a dja peendingosho dopomukunda wavo oufiku, naashi e uya meumbo va ti ina hanga ounona ve mu fiila mo oshivelelwa sha wana.
Oshinima eshi osha etela omukainhu oo ehandu, ndele vati a xwameke onduda omo kwa li mwa nangala ounona vaye vane ndele ta faduka po.
Oshiningwanima eshi osha ningwa momafiku 15 omwedi ou komukunda Omainda moshitukulwa shaHangwena efimbo longuloshi.
Omupopiliko wopolifi moshitukulwa shaHangwena Sergeant Andreas Nghiyolwa okwa hokolola ta ti konima eshi omukainhu a tema onduda younona okwa ka lombwela ovashiinda opo vaye va dime omundilo ndele ta faduka po a yuka moixwa.
Ka pe na okaana ka mona oshiponga ashike oinima aishe ayeshe ya li monduda omo oya pila mo.
Opolifi oya hokolola ta ti okaana keedula 15 aka oko ka kulunhu kuvakwao oko ka endelela oku kufa mo oundenge vako monduda ya haka omundilo.
Ovashiinda navo ova endelela opo vaka yambidide ounona ashike eshi va fika meumbo ova hanga nale ounona ve li pondje tava kwena va tila omundilo.
Umwe womukwapata vomukainhu ou vati a tema onduda omundilo Mathilde Shimbode okwa hokolelela Kundana ta ti mumwainakadona okwa li a kolwa efiku olo a tema onduda younona omundilo.
Shimbode okwa ti omufekelwa oha kala alushe ngeenge a dja keendingosho oha kala ta pula ounona oikulya ashike ngeenge ina fiilwa mo oha kala tatuku nokutangunina ounona meumbo.
“Okwe uya meumbo lwopotundi 21h00 ta pula ngeenge okwa fiilwa mo ouvalelo. Omona waye ou a kula ku vakwao okwa penduka nokuyandja ouvalelo kuina,” ta hokolola.
Okwa ti vati eshi a pewa oikulya okwa ya monduda omo mwa nangala ounona teva pula kutya omolwashike ve mu fiila mo ombelela ishona.
Shimbode okwa ti omufekelwa okwa ya konduda imwe i li meumbo omo ha tuvukile ombike yaye ndele ta tileshi evela nombike alishe.
“Okwa ka lombwela ovashiinda opo vaka dime omundilo. Okwa lombwela ovashiinda kutya ote ke li kufa omwenyo shaashi vati okwa loloka okulilwa oshivelelwa kounona vaye,” Shimbode ta hokolola.
Okwa weda po ta ti fiyo opapa ka pena ouyelele kutya mumwainakadona oku li peni onghee paife ova limbilwa.
Kwau e na oyelele kombinga yomukainhu ou na kale a lopotela diva ovakwapata vaye ile opolifi keshe i li popepi.