■ Loide Jason
WINDHOEK- Ngoka a li Ominista yElongo , Uunkulungu nOmithigululwakalo Katrina Hanse Himarwa ngoka a ikutha miilonga mEtiyali lyoshiwike shika konima sho a monika ondjo moshipotha shokulunga iitapula okwa ti kutya ye ina thiminikwa nando okomuntu opo a kale a thiga po ombelewa ihe okwe shi ninga okuza komutima gwe.
Hanse-Himarwa ndhika okwe dhi popi mEtiyali komatango konima ashike sho a pititha omukanda gwe gwokuumbila mo oshifanduke momapulaapulo kaatoolinkundana mboka ya yi moonkundathana naye.
“Ngame onda tokola opo ndi umbile mo oshifanduke ndi gandje ompito kAanamibia ya lelwe komuntu gumwe a yooloka ngoka e na edhina nondjokonona ya yela she, oshoka ngame onda monika ondjo kompangu yopombanda sho nda longitha ombelewa yandje pambambo omanga nda li ngoloneya gwoshitopolwa shaHardap momumvo 2014,” osho a popi ngaaka komeho yomathano.
Hanse-Himarwa okwa li a monika ondjo komupanguli Christie Liebenberg mOmaandaha goshiwike shika nokwa li a lombwelwa kutya okwa popya iifundja mompangu opo a itaalithe ompangu kutya uuyelele mboka wa gandjwa koombangi kawu shi woshili na ye ina longitha ombelewa ye pambambo.
“Minista ngoka okwa fundja. Okwa hokolola iifundja, ye okwa lundila aakonaakoni mboka ye li oombangi dhepangelo kutya oya thiminika oohatoyi moshipotha okupopya oshili shoka tashi nyateke edhina lya Hanse-Imarwa. Onkene shoka omutamanekwa oku na ondjo,” osho omupanguli a lombwele ompangu ngaaka.
Hanse-Himarwa okwa li a longitha ombelewa ye okukutha mo edhina lyomukwashigwana momusholondondo gwaamboka taya pewa omagumbo e ta tula mo omadhina gaapambele ye opo ya vule okupewa omagumbo ngoka.
Onkene sho a longo ngaaka okwa monika ondjo mwaashoka nokwa tegelela a ku uve egeelo lye momasiku sho taga ka kala 25-sigo 26 gwomwedhi nguka.
Omupresidente gwoshilongo shika Hage Geingob okwa hokolola kutya ye okwa taamba ko nomaako ge li gaali sho Hanse Imarwa a tula mo oshifanduke, oshoka okwa simaneka ompango nomalandulathano goshilongo.
Okwa ti kutya ye okwa gandja ompito yaandjuka kuminista kwa li a thige po ombelewa ndjoka niilonga mbyoka a li a nuninwa, shiliko ngashingeyi oku ulika ashike ominista ompe ndjoka oyo tayi ka ya pehala lyaHanse Himarwa.
Himarwa okwa ulika kutya ndika olyo ethimbo edhigu kofamili ye noshowo kookuume ke mboka ye mu shi nawa noya kala ye mu inekela.