Ethimbo lyomatango omanene moNamibia lya konekwa hali faalele oomwenyo dhoyendji okupitila miiponga yomeendjila.

Onkene ehangano lyoMotor Vehicle Accidents Fund (MVA) oku pitila moshikonga shoku kelela iiponga yomoondjila shoNational Road Safety campaign 2024, opamwe nopolisi yaNamibia oya gandja omakumagidho opo oshigwana shi kotoke ko ku kelelwe iiponga pethimbo ndyoka.

Oshikonga shoka osha nuninwa oshilongo ashihe nosha patululwa pambelewa oshiwike sha ziko no ya  tameke momasiku 15 gaNovomba tayi ka hula momasiku 17 gaJanuali omumvo ta guya

Omupevi minista muuministeli wiilonga niiyenditho Veiko Nekundi okwa kumagidha oshigwana ta ti, mboka taya katalela po aakwanezimo yawo kiitopolwa ya yooloka, naya longithe nawa omandhindhiliko gomoondjila okuyanda iiponga hayi holoka unene pethimbo ndyoka lyokili nomumvo omupe.

“Otwa hala ethimbo ndyoka lyi kale lyaa na iiponga yasha, sho shoka tatu kumagidha aahingi yiihauto ya simaneke omandhindhiliko oshowo ya hinge nuukeka,” Nekundi ta kumagidha ngaaka.

 Ehangano lyoMVA olya ti, okuhinga nuukeka oshowo nethimbo olyo etokolo lyomondjila oshowo onkalo yoku yanda iiponga moondjila.

Ta yati, uuna oshiponga sha holoka mondjila dhenga konomola yopolisi 10111 nenge MVA 9682 ndyoka itayi pula oshimaliwa kongokondhi.

Opolisi yaNamibia oya kumagidha wo aahingi yiihauto, ya hinge nuukeka oshowo okugwanitha po oompango dhomoopate.

Omukuluntu gwopolisi moshitopolwa shaShana Nafal Lungameni Sakaria naye okwa londodha wo aahingi kaaya hingilile, yo kaaya hinge ye li kohi yomaluvu nenge ya vulwa. 

“Omimvo dha piti, pethimbo ndika lyomatango omanene, oyendji oya kanithile mo oomwenyo dhawo, ihe olundji ohashi holoka kokwaa landula omandhindhiliko gomoondjila oshowo okuhinga ye li kohi yiikolitha,” Sakaria ta ti ngaaka.

Ta ti, okuhingilila itaku ti okuthika. Nonando oto hingi kashona owuna okuthika ashike, omolwegameno lyoomwenyo mwa humbata mohauto yoye oshoyo dhayakweni ye li wo moondjila. 

Sakaria okwa ti oshitopolwa shaShana osha ilongekidha okulwitha iimbuluma pethimbo ndika, onkene itaya ka pitika nando omuntu ta ka konda nenge ta ka teya oompango adhihe dha tulwa po.

“Ngele oshigwana osha landula oompango adhihe dha tulwa po, nena kape na nando uuwinayi washa tau holoka. Ethimbo ndika olyokunyanyukwa ihe kali shi lyokukala momaluhodhi,” ta kumagidha ngaaka.

Natango opolisi miitopolwa yilwe yokonooli nayo oya ti oyi ilongekidha okulwitha iimbuluma mbyoka hayi indjipala ethimbo lyomatango omanene, oshoka iitopolwa mbyoka ohayi kala yu udha.

Oya kumagidha oshigwana shi kale sha kotoka, oshoka ethimbo ndika aafuthi oya tegamena okuteya omagumbo omanga ooyene ya ka talela po kiitopolwa yilwe.

-vkaapanda@nepc.com.na