EENHANA- Ovanhu omayovi okwa li vangudumana komaendo omapendafule kEenhana pefimbo lefudiko lomukondjelimanguluko, epandafule Kanana Hishoono nokutumbalekwa molwoupenda waye. 

Okwa xulifa konima yoivike ivali koshipangelo shaNdangwa mepupi lomido 89. Okwa pewa efudiko lopapangelo molwashi okwa li omukondjelimanguluko wo shili a longa noudinini pefimbo loita. 

Omupresidente Netumbo Nandi- Ndaitwah okwa popya ta ti Hishoono okwa li omulumenhu e na oshisho noshiwana, omunambili nokuna oukumwe. “Hishoono okwa dana onghandangala ya kula pefimbo loita. Okwa li kondje yoshilongo ta yandje omayele kovakwaita voSwapo,” ta ti. 

Okwa weda po ta ti Hishoono okwa li a lamba ya kula moSwapo tai minikile. Omupresidente mukulu Nangolo Mbumba okwa ti Hishoono okwe va yambidida opo va dule okumona oukalata wongudu yoSwapo. 

“Pefimbo loita Hishoono okwa kala e kwetele komesho ongudu yoSwapo ta yandje omayelele nokutu xwaxwameka tu longe nondjungu,” ta ti. Hishoono okwa li natango mwene womukunda Onambutu moshitukulwa shaHangwena. 

Oshiwana shomomukunda Onambutu osha tanga mwene womukunda wavo Hishoono tashi ti okwa li omulumenhu ha longo pauyuuki nokuhole ombili. 

Omonamati waye Abed Hishoono okwa hokolola ta ti xe ota lilwa kOvanamibia aveshe shaashi okwa li omukondjelimanguluko, a li kondje yoshilongo opo Namibia a kale a manguluka.“Nena ohatu lili tate wetu, omulumenhu ou kwa li e na oshisho noshiwana nokuhole elandulafano,” ta ti. Okwa ti xe okwa wanifa po oshinakuwanifa shaye shaashi okwa yakula nawa Ovanamibia. 

Abedokwatixeokwaliomulumenhu e hole okupwilikina nawa alushe ngeenge ta popi nounona vaye ile nakeshe umwe. 

“Tate okwa li omulumenhu e hole okupukulula ovanhu shaashi kakwa li ehole atu ningi omapuko meumbo,” ta ti. Okwa fiya po omukulukadi waye nounona vaye va hetatu. 

-fhamalwa@nepc.com.na