Paulus Shikub
!Gomenǁgams
!Kharagase ǀaeǁgâusa xu mâ kliniks hîa HIV/Aids ǀae-aona nî !oabase !Gomenǁgams di Kuisebmund ǁanǁguib !nâ mâs ge noxopa kai kliniks hîa hoa ǀaen !aroma mâs tawa !amǂgāhe tama hâ, ǁnāpas ge ǀnai nēti ī !amǂgās di ǂkhanisa a sīs khao!gâs tsîna.!Kharu ge ǀgam kurikha !nân ge HIV/Aids ǀae-aona nē !gomsiba ǂhôamāǂui!khaigu tawa !nuri tsî gem î ǁîn nauna xu ra ǁaraǂuihe tsî ǀgaisa ǂnaoǂnûi-aihesa tsēkorope ra !kharu!nâsa. Nē ǀae-aon ge Nampasa ge mîba, ǁîn di HIVs !haros hoan xa ra ǂanhesa ǁnā kliniks tawan ǁîn ARVna si ra ūǁnâ soab ai tsîn ǂguin âna taob tsî !gôaǁnâhes !aroma soǀôan âna si ūǁnâ tama ra īsa. ǀGui ǁanǂgāsabe-i ge gere mî, “nau khoen !aroma-i kaise a supu !khaisa sa
HIVs !harosa supuse ǂanǂuisa, ǁnā kliniks tawa da ǁkhâkorobe si raigu !nâ soǀôan !aroma ra mâ tsî mûhe amaga. Nampas ge ǁîs ǀkhāba xu noxopa ra ôa-am !ereamsa ministeris ǂUrusib tsî ǀHûhâsi !Oabadi disa xu hōsa xawes ge a !gâi!gâo!nâ. Nampas ge noxopa ra mî, ǁîs di dîdi hîas ministeris ǁga ra sî!kharudi tsîn !ereamhe tama hâsa. Ai!â gere ǂoa wekheb Donertaxtsēs aib ge Minister Bernhard Haufikuba ǁkhā !gomsib tsî dîs ǀkha Tsoaxaubams ai ge !oahe tsîb ge ǁîba ge mî ǀnais ge ǁguiǂamra sîǂkhanisa 2015ǁî kurib ai a sîǂuihesa ǁkhā mâsib !nâ mâ klinikdi hoadi nau kai klinikdi !nâ nî !amǂgāhe tsî hoa ǀae-aona ǀgorasa dī tamase nî !oabasa. Haufikub ge ge mî ǁîb ǁnâu!ā tama hâsa aibe i tare-i !aroma ǁnāti ī ǀgorasa klinikdi !nâ nî hâ tsî ǂnaoǂnûiǀkhās ǀkha ai!gûsa. Haufikub ge !aruǀî gem î ǁîb ge ǁkhā ǁguiǂamsa Elavi kliniks, Oshivelos !â!âb ai ǂnôas tsîna a māsa ǁîs tsîn ge ǀguri hâ kliniks hîa ǂgâ-ams tawa ‘HIV Kliniks’ ti a ǂgaiǀonsasa mâi hâ i amaga. Kondumgu tsîn ge ais ǀkhāb ai gfu nî mâibahe tsî ū ra khoena naun xa mûhesa ǂhâbasa tama hâ, xawe !gāsa ǂans ǀae-aon dis ǀkha ǀnîpa a ūhâ-e ǁkhā in ǂhâsiba ūhâ khoena ǁnāpa si ūǁnâbasen. -Nampas