WalvisBay- Silyo sanare sombongarero zanavenye ntani mukondjeli emangruko Ben Amadhila kahundilire vaswapo navenye asi vahepa kukahorowora mbunga politika zawo rambangako nakandindate gwazo yipo kwahakakara epangero lyokulipakerera.
Age kahuyungisire vakwatesiko mbunga swapo mosondaha zina puko nokuvahundira asi vakahorowore swapo, nokugava marondoro asi yinke yina kuhoroka moyirongo yimwe unene ngwendi moSouth Africa, omu mbunga mpangeli vazisininika asi zahepa kukara ndi kutulisapo epangero lyanavenye omu vana kugendesa kumwe nonombunga mpatanesi. ‘’ VaNamibia vahepa kupa mbunga zaswapo nonkondo dokupangere. Yizo tupu mpito zina karapo zokutanta asi kapi napakara nompito dokumusininika asi ngapi nomugendesa sirongo, moomu tupu tuna kuyingambipara mosirongo somaparambo moSouth Africa.
Ose kapi tatutenfura konyima. Twahepa kuhorowora morwa kuna kuwapayika meho zovana vetu, vakurona vetu, ntani uhwi nye wosirongo setu,’’ yimo ngoso ana kuhundira. Age kahundilire nkenye gumwe muswapo asi gahepa kukahorowora Netumbo Nandi-Ndaitwah momazuva 27 November 2024. Age simpe kahundilire asi nkenye ogu galitjangesa gahepa kuruganesa mpito ezi aka horowore.
Ano nsene tuna kamuhorowora, Nandi -Ndaitwah nakara nye Presidente gomukadi gokuhova moNamibia eyi nayikara asi ose ngovaNamibia twahepa kuhafa momunene’’ yimo ana kutanta Amadhila.
Age simpe katente mulyo gokukara nomahoroworo, morwa kuretesapo mpora ntani kutulisapo ukumwe mosirongo nasinye saNamibia. ‘’ Mahoroworo aga mulyo unene. Kuna kara asi twahepa kutwikira nompora, ntani una politika wetu uze komeho pwahana madonganeso, yipo asi sirongo setu tusikulike tuwapeke meho zovanona, vadinkantu, vanona ntani vakurona vakare mompora.
Apa nye ana kutara kweyi garugana Netumbo Nandi-Ndaitwah monomvhura odo vamupa sirugana sokulisiga siga moswapo ndi asi mosirongo, age gageveko tupu yimwe kutamekera mo 1970, apa nye gamumwene rokuhova opo awo simpe kuna kukondjera sirongo sika manguruke.
Ame kwaligwene nendi mo 1975, …. Age opo simpe mukadona gona, gomuwa sili, ogu ngasikama gahana woma momudwaro gwendi goukwayita. Age kwahetakanene kumwe novagara ngavadwara mudwaro goukwayita – mukadona ogu gakere asi hawe toka tanta. Age simpe kagwedereko asi mukaro nye gwendi gokulituramo gwawapeka umpitisili wendi dogoro nayina. Age simpe katangaukire Ndaitwa asi gumwe gakara noudivi mokugendesa epangero, unene apa nye gakere asi mominitseli zeyi yoponze zosirongo, omu gareterepo mukaro gokulisiga siga. Age kwarugana yirugana yomutaro, age gumwe hena gadiva mbunga politika zendi monad zazo noponze zazo.’’ Yimo ana kutanta ngoso. Age simpe kuna kugwedako asi Nandi-Ndaitwah udivi wendi moNamibia noudigu wawo, kuna kumuninkisa akare nononkondo asi age kandindate mwene,mwene.