Rudolf Gaiseb

Aiǂnû-aob Bible Societys Namibiab dis dib, Schalk Bothab ge ge mî, ǁîn ǀorosib Elonmîdi diba !hūǁî gowagu ǂnûi!khunidi !nâ ra hō!â !khaisa. 

New Erab ǀkhab ge ǀgūǁ-ae ūhâ i dî!nâǁgamǁares !nâb ge ǁîba ge mî, !nubusib maris dib xan ǁîna ǂgui !gôab !nâ !hūǁî gowagu !nâ a ǂnûi!khunisa Elobmîde !auga!hūga xu a ǁamaǂgan ǁoa !khaisa. 

“Sida ge Chinab tsî South Koreab hâkha xu ra ǁamaǂgan. !Kharu ge kurigu !nâ da ge aibe maris ose ǁamaǂgan tsî ega gere mātare, xawe ǀnîkhamikō kurigu !kharu hâse nē ǁamaǀgauba ge dawahe tsî da ge ǁamaǂgan da ra kō !gôab di Elobmîdi marisa nî mātaretoa. “Nēpa da ge ǂkhari mari-i xa !hoa tama hâ. ǂGui maris xa da ge ra !hoa. ǁAupexats ge N$800 000 xu N$1 mijuns kōse hâ marisa nî ūhâ nē Elobmîde sada !hūb !nâ hā-ūs !aroma. ǁ-Aupexa ra !nona ǁkhâgu ǁaeba ǂgaus ǀkha ū, !hūb !nâ ǂgâxasa. ǂGui !gôab !nâ ǁamaǂgans ge ǂganǀgauba ra ǀoroǀoro,” tib ge ge mî. 

Bothab ge ǁguiri-aona gere ǂgan in nē ǂnûiǂgāsa mâxōǀkhā ǁîs di !ereamxasib !hūǁî gowagu !nâ Elobmîsa ǂnûiǂgās disa sī!nâs ǂnamipe. 

Nēs ǀkhas ge Bible Societysa nî ǁawoǁawo, !kharaga gowagu !hoa-aon ǁîn di ǁgûsigowagu !nâ-ū Elobmîs ǀkha nî ǂharugusa. 

Gowagu hîas nē ǂnûiǂgāsa Elobmîde ra ǁgâiǁnâ!nâ tsî ǁamaxu gu ge, ǂgaiǀons ai ǀNawegowab, Hererogowab, Rugwangalib, Khoekhoegowab tsî Thimbukushu gowab hâga, ts. ǁn. Nē ǁ-aeb !nâs ge ǂnûiǂgāsa !nāsa gowagu di Elobmîde ūhâ tama hâ, Hurigowab ǀguiba ǂoa tsi. 

Bothab ge ge mî ǁama-aona xub ǀgaisa ǁgâib Elobmîdi diba hâ !khaisa. “Sida ge !hūb a ǂhabase khoena sī!nâs !aroma a ǂhomisa tsî ǀAeǁgams, Ondangwas tsî Ongwedivas !nâ a sîsenxa. Mario!nâse da ge skolgu, kerkhegu, kairan hâ!khaigu tsî !oaǀgôan hâ!khaigu !kharaga ǀhûhâsigu !nâ sada !hūb !nâ mâgu tsîna Elobmîde ǀnî khami ī projekn !nâ-ū ra ǀgoraǂuiba. 

“Sida ǁaxasiga ūǀgaras !aroma da ge ǁaxasiga kurikorobe ra ūhâ mariǀhaoǀhaos ase, î da nēs ǀkha mario!nâse Elobmîde ǀgoraǂui ǁkhā. ǀGui ǂgaoǂgao!nâs ǁaxasib hîa da ūhâb ge ‘Hui Elobmîde ǁgâis ǀkha î !hūǁî gowaga Namibiaba !oa hā-ū,” tib ge ge mî. Nē dīǀgaub ge a ǁkhowa-amsa ǀguiǀguibe khoen, ǂnûiǂgādi tsî kerkhegu !aroma. 

“ǁGuiri-aon ǀkha da ge N$10 000 Elobmîde mâ gowab hoab !aroma a ǁgâi kai ǁkhā. Ai!âb Bothaba ge a mîs ge, ǂguro !nās ase nî īsen ǀgôaron ǀgapetsanadi Elobmîs hîa !hūǁî gowagu !nâ a ǂnûi!khunisasa ra māǂuisa, Oshikwanyamab, Otjihererob, Oshindongab, Khoekhoegowab tsî Rukwangalib !nâ hâse.