!Hūb di ǁÛb Hage Geingob ge ǂhanub sîsenaona ra ǂgan, in ǁaeb ai tsî ǂgaoǀkhāsa !harib ai hâ !oabade ǁanǂgāsabena mā tsî nēs !nâ-ū ǂâuǀoahâ ǂgaeǂguisa !khōǀgara.
Geingob ge nēsa ǂoa ge Fraitaxs aib ge ūhâ i ǂhaitsi māǂuis, tsēdīs Hoa !Hūbaisi ǁAedi (UN) tsî Afrikab ǂHanub Sîsenaon Tsēs dis tawa ge mî, ǂhâbasa i a !khaisa ǀomkhâi ra tsî !amǂgāsa Afrikaba da ǂharuguba !hūb !nâ tsî !auga!hūgu ǁga sîǂuis tsî ǂgâxa-ūs, ǂhanub sîsenaona nî ǁawoǁawosa in ǁanǂgāsaben, ǁguiri-aon, !narisarima-aon tsî hoaraga khoen hîa ǂhanub !oabade nî hōse in !gôasiba māhe tsî ǁîn ǂhâba hâ !oabade, mâ-i ǀgui-i ka xawe ǂâuǀoasasib !nâ tsî ǁaeb ai nî māhe !khaisa.
Nē tsēs hîa ge ‘!Hae!haes Afrikab ǀGui!nâxase nî ǂHarugu!nâ !âb di Tsoatsoasa’ ti hâ ǂgaiǂgams !naka gere tsēdīhes ge ǁkhāti ǂâiǂâi!nâs !gâi tanisenǀgaugu tsî ǁgūbadi ǂhanub sîsenaon ǁguiǂams ase hâde, ǁîdi !nâ-ū da ǀgâsiba !khamǂuisa a sī!nâ ǁkhāsa, Mûǂuib 2063 da ǀgui!nâxase tsî ǀomkhâis ǀkha ra !gû!oase.
“Satsa ǂhanub sîsenaose īs ge a ǂgai tsî ǁnā-amaga ǁguiǂuisa ǁgaragu ǁnā beros, ministeris tsî ǂnûiǂgās digu !naka nî !oabade māse. Nē ǁgaragu tsî daoǁgaudi sats ra sîsen!nâ beros, ministeris tamas ka i o ǂnûiǂgās din ge ra mîba tsi mâ ǀgaub !nâ tsî ǀnōb aits !oaba-aona nî !oabasa. ǂHanub sîsenaots ge ǀguixasib tsî ǁguiǂgāsens ǀkha sa sîsenna nî dī tsî nēs ǀkha ǁawoǁawo, Republiki Namibiab dib di ǂhanub di !âubasens hîa ǂâuǀoasasib ǀkha ǂgaeǂguis ai !gaoǁgui hâbats nî sī!nâsas, Harambee ǀOmkhâis ǀAweǁguib di !âs ase,” tib ge !Hūb di ǁûba gere ǀgonǀgon!gao.
Hoa !Hūbaisi ǁAedi (UN) ge 23 Gamaǀaeb disa ǂHanub Sîsenaon Tsēs ase ge !khō!gâ tsî nē tsēsa 2002ǁî kuriba xu kurikorobe ra tsēdī. Nē tsēs ge ǁkhāti Afrikab ǂHanub Sîsenaon Tsēs ǀkha ra ǁnāǀhao hîa ǁîs di ǁgūbasa ǂan!gâsa mās !oabadi hîan ǀhûhâsiga ra !khō!oas tsî !ereamxasib hîan ǂhanub sîsenaona ūhâb !hū!nāsi tsî !auga!hūsi omkhâisens ǂnamipen !oagu. – Nampa