ǀAeǁgams
Ministris ǂUrusib tsî ǀHûhâsi !Oabadi dis ge ǁawoǁawo tsî ge mî !hūb di ǂurusib !oaba!khaigu ǂâuǀoa hâ ǀnōb !nâ hâ antiretroviral soǀôana (ARVs) hâsa, nausan ǁnāpa ǂhoana hâ ǀorosib ra hō!âhe ti ra mîna hîa. HIVsa ūhâ ǀae-aon ge ǂoago wekheb !nâ gere !gaesen, ARVn ǀorosiba, !gōsase Robert Mugabe kliniks hîa ǀAeǁgams di ǁaegub !âb !nâ ǂnôas tawa. ǀGui ǀae-aos hîa ǀonsa ǂanhe tama is ǁnâugus !naka gere !hoas ge New Erab ǂhôare-ao-e ǂoago wekheb Mantaxtsēs ai ge mîba, ǁîn ǀgūǁae ge tsoatsoase nēsi !kharaga!nâgu ARVna ra !khō!oasa tsîs nēsa ǁîn ra ǂgomsa !oa ǀnîn ân di ǂurub !gomsigu ase īsa. “Tita ge ǂkhawusase ge tsâtsoatsoa ǁnā ǂhoa pelde ta ge ātoas khao!gâ tsîb ge ǁkhāti ǀaob tsîna ge ǀgapi. Nēti ī mâsi-i !nâ ta ge tita noxopa hâtsâ tama hâ gaxu ǁaeb ARVna ta ā!goaxab !nâ,” tis ge nē ǀae-aos hîa ǀons âsa ǂgaihesa ge ǂkhāsa ge mî. ǁÎs ge !aruǀî ge mî, ǁîs ǁanǁare-aos ge ARV pelnn âsa Robert Mugabe kliniks ǁga ôa tsî xawe ǁîn ose oaǀkhī tsî a mîsa soǀôan koma a ǀkhaisa ǁîn toahâ xui-ao. “ǁÎs ge peln di ǀkhais !nâ aibe Moringa ti ra ǀonǂgaihe soros omkhâisens peldi ai hâ,” tis ge nē ǂhôare-aosa ge mîba. “Sida ge a ǀū !gomsib mâpa ǁgoesa, xaweb ge nē !gomsiba oresa ga hōbahe, HIV positif ǀae-aon ǁîn soǀôana !kharu!nâ tidese nî ās a xui-ao,” tis ge nē ǀae-aosa ge mî. Mîgowaba-aos, Ministris ǂUrusib tsî ǀHûhâsi !Oabadi dis, Ester Paulus ge nēs ai !eream tsî ǂoago wekheb Wunstaxtsēs ai ge mî, nē pelnn di ǀûb tamas ka io mâtikōse di ra āhes ǀkhara sîsenǂuiba ǀae-aon ai a ūhâ ǁoasa ǁîn a ǁkhā ARV soǀôa amaga. “Nēs ge ǁkhāti ǀguis khami ī !kharagasi-i tsîna ūhâ tama hâ ǁîn ga Ugandab, Asiab tamas ka io mâpa xu ǀgui a ǁamahes tsîna hoan a ARVsoǀôa xui-ao tsî ǁnās ǀkha !gâi tama sîsenǂuiba ǀae-aon ai ūhâ ǁoase,” tis ge Paulusa ge mî. Hoarahūs !kharagasib hîa hâb ge nēsin ǀae-aona ǀgui pels ǀguisa ra āsa ǂguron gere ā !nona peldi soas !nâ. Paulus ge ǀgonǀgon!gao tsî ge mî hoa ǂurusib !khaigu ǂauna ARVna ūhâsa.