Omulumentu gwomimvo 33 okwi ikuthile omwenyo moshipangelo oshinene shaRundu moka a kala moombete uule womasiku gatatu.
Otaku hokololwa omulumentu ngoka e li oshilyo shetanga lyegameno anuwa a li e na okulalekwa mo moshipangelo Etitatu ashike okwi imangelekele koongulasha dhEtiyali nongodhi yolusheno.
Opolisi inayi yelitha natango ngele omulumentu ngoka okwa thiga a shanga shoka sha eta opo a ikuthe omwenyo.
Omukuluntu gwopolisi ta lele pakathimbo moKavango Uuzilo, Eino Nambahu okwa koleke oshiningwanima shoka, ihe ina vula okugandja uuyelele awuhe oshoka anuwa omakonakono oge li poshimbi ethimbo ndika.
Opolisi oya kala nokugandja omalongo oshilongo ashihe kutya uuna pe na ngoka e na uudhigu tau mu thimininike na thike mpoka ta vulu okumona ekwatho, opo ku vulwe okuhulitha po omayikuthomwenyo.
Moshiningwanima shimwe inaashi faathana, okanona komumvo gumwe oka si sho ka mangwa mothingo kongodhi ndjoka ya li taya dhana nayo, opamwe nooyakwawo.
Sha ikwatelela kepeko lyopolisi lyiiningwanima ya holoka mehuliloshiwike oshingwanima shoka osha holoka momukunda Onambudu.
Otaku hokololwa kutya okanona hoka ka tseyika nedhina Amon Sackaria okwa li taka dhana pamwe nookuume ke.
Okwa lopotwa kutya omanga ya li taya dhana uudhano wokunuka, ongodhi ndjoka ya li taya dhana nayo oya dhingoloka mothingo yaSackaria shoka sha li sha e ta eso.
Nonando omakonakono gopolisi otaga tsikile inayi yelitha kutya olye a tula ongodhi mothingo yaSakaria nenge pamwe oye mwene.