Metengenekothaneko lyemona lyoshilongo lyomumvo 2022/2023, ndyoka lya pitithwa oshiwike sha ziko, minista gwemona Iipumbu Shiimi okwa ti, omaupyakandhi goshimaliwa ogendji ga gwilila po oshilongo, otaga ka ninga omahwepo.
Shika osha kwatela mo iihohela (otax) ndjoka hayi zi koondjabi dhaaniilonga yokomwedhi, ndjoka tayi ka shunithwa pevi, unene kaantu mboka haya mono iiyemo ili pohi, nosho wo komahangano ngoka kaageshi goomina.
Minista okwa totha mo kutya iihohela yotakisi, otayi shuna pevi, unene yaanilonga yena iiyemo yili pevi oshowo mboka haya longo miilongo kaayishi yiikwamina.
Okwa gwedha po wo kutya otaya ka dhimina po wo mboka yena iihohela yotakisi yili pombanda.
“Nonando twa tokola ngaaka, iihohela yootakisa ngaashi yomakaya oshowo omalovu otayi pombanda,” ta ti ngaaka. Okwa popi wo kutya uuministeli wemona owa ndhindhilike kutya oshimaliwa shiihohela okuza moshigwana oshowo komahangano gayooloka inayi gwanithapo, opo ku vulwe kuningwe omayindilo gomilandu omipe.
Ta gwedhapo ta ti, oya ndhindhilike wo kutya okugwedhela iihohela yotakisi pethimbo ndika, aku dhigupaleke onkalo, okugalula eliko lyoshilongo oshowo okuli kokeka.
“Ota tu ka nkondopaleka neyitulemo okulonga niihohela mbyoka oshowo okukwashilipaleka kutya iihohela yootakisi oya gwanithwapo,’’ ta ti ngaaka.
Etengenekothaneko ndika inali thiga ko aakulupe, nayo oya gwedhelwa N$100.00
Aakulupe otaya gwedhelwa okuza momasiku 01 gaApilili nuumvo.
Ngele N$100.00 ndyoka olya gwedhwako otaya kala haya mono N$1 400.
“Epangelo lyetu oha li tudhimbulukwa aluhe, nonando mwa hala okutuheka tuthigepo ongundu yetu tayi pangele. Ndhika ndhoku gwedhelwa ka kwali nde dhuuvu nando,’’ Kuku Natalia Johannes taligola, ye ta popi ngaaka.
Johannes ka kwali ena ontseyo kutya otaya gwedhelwa, o kwali anyanyukwa yeta pandula.
Tagwedhapo ta ti, ethele ndyoka ota li ka eta elunduluko monkalo moka yeli paife.
“Iikapute yandje oya gwanamo, nenge oothewa dhandje odha gwana mo N$100 00, ngame tandi pungula shoka tashi hupu po,’’ ta ti ngaaka.
Omukulupe gwomukunda Okatana Teopolina Ntinda okwa ti, onkundana ombwaanawa, ethele olundji.
“Epangelo nani o li tu wete owala nonando twa kulupa.
Masiku itomono ashike tuli N$2 000,’’ ta popi ye ta imemeha.
Ntinda ta ti, nayo paife oyafa ashike aanilonga haya kwata komwedhi.
Ta ti epangelo olya longo oshilonga sha simana. Ta gwedhapo ta ti, ngele taya simaneke aakuluntu yawo, nelago otali ya landula sigo aluhe.
– vkaapanda@nepc.com.na