Omunambelewa omukuluntu muuministeli gwelongo Sanet Steenkamp okwa yelitha kutya oosikola otadhi shuna kokukala niikako itatu okuza omumvo tagu ya, 2026.
“Nonando uuminitseli wa tokola okutopola omumvo niikako yosikola itatu, shoka otashi tameke ashike omumvo tagu ya, omanga omumvo nguka tagu kala gwahugunina niikako iyali,” Steenkamp ta fatuula ngaaka.
Ta ti, shoka osha tulwa miilonga konima aakuluntu yelongo kiitopolwa ya yooloka ya li ya kondjitha opo iikako itatu yi galulwe.
Ta gwedha po kutya, oya gandja omatompelo ga yooloka.
Taya ti, iikako iyali ohayi kala iile unene nohashi ya longitha nuudhigu.
“Iikako mbyoka iyali okwa li ya tulwa miilonga mo2020 sho oshilongo sha li sha ponokelelwa komukithi goCovid-19, sho natango kwa li kwa tulwa miilonga oonkatu dhilwe dhokulonga okupitila komalungula,” ta fatulula ngaaka.
Omumvo gwa zi ko koshitopolwa shaShikoto, aalongi naalongwa osho wo aavali okwa li ya ningi oshigongi taya pula omukuluntu gwelongo opo iikako itatu yi galulwe.
Taya ti, iikako ohayi kala ya topoka nawa, yo ohaya kala ye na ethimbo lya gwana okwiilongekidha ekonakono lyokomumvo.
“Niikako iyali, shotango ohashi huulile muJuni sigo Juli pethimbo lyuutalala, ethimbo ndyoka itatu lesha nawa oshoka okwa talala. Oshikako shimwe ohashi kala oshile unene, inaatu fudha po,” ngoka ogo omatompelo gamwe gomwaangoka ya li ya gandja.
Konima onkundana ndjoka ya li ya pitithwa aavali naalongi yamwe okupitila komalungula oya li ya gandja olupandu kuuministeli welongo, sho wa tokola okugalula iikako itatu.
Yamwe otaya tsikile okukondjitha okushuna komulandu gosikola omukulu, oshoka ngoka tagu longithwa ngaashingeyi anuwa kaye gu uvite.