Omunafaalama gumwe moshitopolwa shaShana, ongula yOmaandaha okwa penduka moshiningwanima oshitilithi, sho iikombo ye yi li 12 ya lika komitse koshilikama inaaye shi mona. Sha ikolelela kumwene gwiikombo Olga Sevestus, oshiningwanima shoka osha holoka momukunda Otuwala moshitopolwa shaShana, potundi inaaye yi tseya. “Iikombo yandje yi li 12 ayihe oya ninga oombululu komitse, tayi shisha oombinzi. Itano yomuyo nombwa yimwe oya sa omanga iheyali yi na oombululu tadhi shisha ombinzi,’’ ta hokolola ngaaka.
Ta gwedha po ta ti, ke wete iikombo mbyoka ya hupu po tayi kala nomwenyo, oshoka nayo otayi ulike yi li monkalo ombwiinayi. Sevestus okwa ti, ita vulu okuhokolola shoka sha li iikombo ye, oshoka ine shi mona. “Sho kwa li twa penduka okwa li twa mono ashike omakaha, ihe katu shi kutya ogashike,’’ ta popi ngaaka.
Ta ti, opo lwotango a ningilwa omuyonena gu li ngaaka monkalamwenyo ye.
Ihe ke shi ngele oshiningwanima shoka osha li sha holoka mo nale momukunda moka Otuwala, oshoka opo e ya mo. Ta gwedhwa po ta ti, natango sigo ethimbo ndyoka kwa li ta popi naKundana ka kwa li a lopotelwa ngele ope na iikombo yimwe ya lika momukunda moka.
Omunambelewa omukuluntu nomugandji gomauyelele muuministeli womidhingoloko iihwa nomapashiyono Romeo Muyunda okwa ti, uuministeli ohau futu ashike iimuna ya lika kiiyamakuti ya gamenwa.
‘’Ngele iimuna oya lika kiiyamakuti, ohatu ningi omakonakono agehe ga pumbiwa ngoka hage tupe uuyelele awihe, opo uuministeli wu vule okufuta iimuna ya lika,’’ ta fatulula ngaaka. Ta ti, ota indile oshigwana shi kale aluhe hashi lopotele uuministeli womindhingoloko meendelo una iiningwanima yolundhi nduka ya holoka, opo ya vule oku mona kutya oshike lela sha lya iimuna.
“Ohashi kala oshipu kutse okumona kutya oshike sha lya iimuna, ngele twa thiki poshiningwanima mbala,’’ ta popi ngaaka. Omugandji gomauyelele moshitopolwa shaShana Thomas Aiyamibo ngoka a li akoleke oshiningwanima shoka okwa ti, iikombo mbyoka kwa li ya hupu po okwa li tayi tondoka ya ngwangwana omanga yina oombululo no tayi shisha ombinzi.
vkaapanda@nepc.com.na